ڈپٹی کمشنر تسنیم علی خاں نے کہا ہے کہ صوبائی حکومت ترقیاتی سکیموں کیلئے ہر ممکن وسائل فراہم کر رہی ہے تا کہ مربوط ترقی کے خواب کی تعبیر کو پورا کیا جا سکے، انہوں نے کہا کہ اگر کسی جگہ فنڈز کی کمی بیشی یا دیگر رکاوٹیں حائل ہیں تو ان کو اعلیٰ حکام کے نوٹس میں لا کر فوراً ترقیاتی اسکیموں کو مکمل کیا جائے۔ موجودہ حکومت کی اولین ترجیح عوام الناس کی فلاح وبہبود کیلئے کام کرنا ہے جس کیلئے تمام متعلقہ محکمے ذمہ داری کا مظاہرہ کریں کیونکہ جتنی جلدی ترقیاتی منصوبہ جات مکمل ہوں گے عوام اتنا ہی جلد مستفید ہو گی۔
منڈی بہاﺅالدین( ایم.بی.ڈین نیوز 24 اگست 2022) ان خیالات کا اظہار انہوں نے ترقیاتی سکیموں میں پیشرفت کے حوالے سے پی پی 67 کی جاری سکیموں کا تفصیلی معائنہ کرتے ہوئے کیا۔ اس موقع پر ایڈیشنل ڈپٹی کمشنر فنانس حافظ غلام مرتضیٰ، ایکسیئن ہائی وے، روڈز، ایم اینڈ آر، بلڈنگ، شجاعت حسین بھٹی، سابقہ چیئرمین بھوا حسن لیاقت علی بھٹی اور دیگر متعلقہ محکموں کے افسران بھی موجود تھے۔
اس موقع پر مختلف منصوبوں پر تفصیلی جائزہ لیا گیا۔ ڈپٹی کمشنر تسنیم علی خاں نے کہاکہ حکومت نے رواں سال میں جاری پراجیکٹس کیلئے فنڈز مہیا کر دئیے ہیں۔ ترقیاتی منصوبوں کے متعلقہ افسران منصوبہ جات پر کام کی رفتار کو تیز کریںاور تمام سکیمیں جلد از جلد مکمل کی جائیں ۔ انہوں نے ضروری ہدایات جاری کرتے ہوئے کہا کہ فنڈز کے اجراء کے بعد ترقیاتی محکموں کے سربراہان جاری منصوبوں کے تمام پہلوﺅں پر کڑی نظر رکھیں۔ کام ٹھیکیداروں پر چھوڑنے کی بجائے محکموں کے افسران سکیموں کی خود نگرانی کریں۔ کوالٹی کے معیار پر کوئی سمجھوتہ نہ کیا جائے گا۔
انہوں نے کہاکہ کام نہ کرنے یا سست روی کا مظاہرہ کرنے والے ٹھیکیداروں کے خلاف سخت ایکشن لیا جائے ۔ قبل ازیں ڈپٹی کمشنر نے رورل ہیلتھ سنٹر بھیکھو موڑ، بی ا یچ یو قادرآباد کے جاری ترقیاتی منصوبوں کا بھی معائنہ کیا۔ ڈپٹی کمشنر نے کہاکہ عوام الناس کی فلاح وبہبود اور بنیادی طبی سہولیات کی فراہمی کیلئے ان سکیموں کو تیزی سے مکمل کیا جائے۔ انہوں نے کہا کہ وہ عوامی مفادات کے تحفظ کے لئے خود فیلڈ میں جا کر ترقیاتی منصوبوں کا گاہے بگاہے جائزہ لیتے رہیں گے۔
