ڈپٹی کمشنر ڈاکٹر احسان الحق ضیاءنے کہا ہے کہ ضلع منڈی بہاﺅالدین ایک پرامن شہر ہے جہاں تمام اقلیتیں اپنے مذہبی تہوار مکمل جوش و جذبہ اور عقیدت کے ساتھ مناتی ہیں ، ضلع میں تمام طبقات امن و سلامتی کے فروغ کیلئے اپنا مثبت کردار ادا کررہے ہیں جو کہ خوش آئند ہے۔
منڈی بہاﺅلدین ( ایم.بی.ڈین نیوز 21 دسمبر 2021) ان خیالات کا اظہارانہوں نے آج یہاں ڈی سی آفس میں کرسمس کی آمد کے حوالے سے مسیحی کمیونٹی کے ہمراہ کیک کاٹنے کرنے کی تقریب سے خطاب کرتے ہوئے کیا ۔ اس موقع پر ایڈیشنل ڈپٹی کمشنر جنرل محمد شفیق، اسسٹنٹ کمشنر منڈی بہاﺅالدین کاشف جلیل، پاسٹرز کاشف رشید، شہباز مسیح، یرمیاہ پال، ضلعی صدر مینارٹی حلیم گل، ممبر ہیومن رائٹس ارشد گل، سموئیل سائم، ڈاکٹر پرویز گلزار، دنیم مسیح، طاہر مسیح اور دیگر مسیحی برادری کے لوگ بھی موجودتھے۔
ڈپٹی کمشنر ڈاکٹر احسان الحق ضیاءنے کہا کہ پاکستان میں تمام مذاہب کے لوگ مکمل مذہبی آزادی کے ساتھ مل جل کر رہتے ہیں اور ایک دوسرے کی خوشیوں میں بھرپور شرکت کرتے ہیں جبکہ دیگرممالک میں مسلمانوں اور دیگر اقلیتوں کے ساتھ غیر انسانی سلوک روا رکھا جارہا ہے جس کی واضح مثال بھارت ہے۔
انہوں نے کہا کہ مسیحی برادی نے ہمیشہ محب وطن اور پرامن شہری ہونے کا عملی ثبوت دیا ہے، ضلعی انتظامیہ ہر سال کی طرح اس بار بھی مسیحی برادری کی کرسمس کی خوشیوں میں برابر کے شریک ہیں اور انہیں کرسمس کی مبارکباد پیش کرتے ہیں۔
ایڈیشنل ڈپٹی کمشنر جنرل محمد شفیق نے کہا کہ کرسمس کے موقع پر مسیحی برادری کیلئے سیکورٹی کے فول پروف انتظامات کئے گئے ہیں ، ضلع بھر میں گرجا گھروں، کرسمس بازار وں اور دیگر عبادت گاہوں کی سکیورٹی کیلئے پولیس ملازمین ،ایلیٹ اور قومی رضاکاروں کی ڈیوٹیاں لگا دی گئی ہیں اور اس سلسلہ میں تمام پولیس ملازمین کی چھٹیاں منسوخ کر کے ضلع کے داخلی اور خارجی راستوں پر تعینات کر دیا گیا ہے۔
اسسٹنٹ کمشنر کاشف جلیل نے کہا کہ قائد اعظم کے فرمودات اور دستور پاکستان کے مطابق پاکستان میں تمام اقلیتوں کو مذہبی آزادی اور برابر کے شہری حقوق حاصل ہیں، ہماری خوشیاں اور دکھ سانجھے ہیں۔ اس موقع پر پاسٹرز نے اپنے خیالات کا اظہار کرتے ہوئے کہا کہ پاکستان ہمارا ملک ہے اور ہم اس میں رہنے والے مسلمان ،عیسائی یا دیگر مذاہب کے لوگ انتہائی ملنسار ہیں۔ ہر پاکستانی اپنے دوسرے مذہب کے لوگوں کے ساتھ ان کی خوشیوں میں شریک ہوتے ہیں۔
انہوں نے مسیح برادری کیلئے سیکورٹی کے فول پروف انتظامات ، کرسمس بازاروں اور ان کی خوشیوں میں شریک ہونے پر ضلعی انتظامیہ کا شکریہ ادا کیا ۔ تقریب کے اختتام پر انہوں نے دعائیہ کلمات کے ساتھ پاکستان کی سلامتی کی دعا کروائی۔
