حکومت پنجاب کی ہدایت پر ضلع منڈی بہاوالدین کے عوام الناس کو مہنگائی سے ریلیف مہیا کرنے کیلئے ایڈیشنل ڈپٹی کمشنر ریونیو ذوالفقار احمد کی زیرصدارت اجلاس میں اشیائے خوردونوش کی نئی قیمتیں مقرر، تمام اشیائے خوردونوش کی قیمتوں میں ردوبدل کا نوٹیفکیشن جاری کردیاگیا۔
نوٹیفیکیشن کے مطابق چاول باسمتی سپر 310 روپے فی کلو گرام، دال چنا (موٹی)210، باریک 200، دال مسور 280، دال ماش دھلی ہوئی520، دال ماش چھلکا 455، دال مونگ 220روپے، سیاہ چنا 210، سفید چنا325، بیسن210، روٹی(100گرام) 15روپے، سادہ نان (120گرام) 20 روپے، چھوٹاگوشت 1،350، بڑا گوشت 700، دودھ فی لیٹر 140 روپے لیٹر، دہی 150روپے کلو جبکہ گوشت برائلر، انڈے، سبزی و پھل وغیرہ کے نرخ مارکیٹ کمیٹی کے جاری کردہ ہوں گے۔
منڈی بہاءالدین میں پھل، سبزی، گوشت و انڈے کی ریٹ لسٹ
ایڈیشنل ڈپٹی کمشنر ذوالفقار احمد نے اجلاس سے خطاب کرتے ہوئے کہا کہ نئی قیمتوں کا تعین تاجر برادری اور سول سوسائٹی کے نمائندوں کی مشاورت، او پن وہول سیل مارکیٹ اور دیگر اضلاع میں رائج قیمتوں کو مدنظر رکھتے ہوئے کیا گیا ہے تاکہ ناجائز منافع خوری کی روک تھام یقینی بنا کر صارفین کو ریلیف فراہم کیا جاسکے۔
انہوں نے کہا کہ ضلعی پرائس کنٹرول کمیٹی کی مقرر کردہ قیمتوں پر نفاذ اور ان پر عملدرآمد سو فیصد یقینی بنایا جائے گا، انجمن تاجران و کریانہ مرچنٹس ضلعی اور تحصیل انتظامیہ کے ساتھ مل کر حکومت کی جانب سے اشیائے خوردونوش کی قیمتوں کو موثر بنانے کیلئے اپنا تعاون اور کلیدی کردار ادا کریں۔
انہوں نے مزید کہا کہ ناجائز منافع خوری اور ذخیرہ اندوزی قطعاً برداشت نہیں کی جائے گی، تاجر تنظیمیں اور تاجر رہنماءکمیٹی کے فیصلوں کو نچلی سطح پر منتقل کریں اور اس با ت کو یقینی بنایا جائے کہ ریٹ لسٹیں اور ریٹ بورڈ نمایاں جگہوں پر آویزاں کی جائیں،جو دکاندار اس پر عملدرآمد نہ کرے اس کے خلاف سخت کارروائی عمل میں لائی جائے گی۔
اجلاس میں ایڈیشنل ڈائریکٹر لائیو سٹاک ڈاکٹر محمد ممتاز بیگ، ڈی او انڈسٹریزرانا محمد سعید، تاجرتنظیموں کے عہدیداران اور متعلقہ محکموں کے افسران شریک تھے۔
