چیف سیکرٹری پنجاب نے منڈی بہاءالدین تا سرائے عالمگیر روڈ کا افتتاح کر دیا

چیف سیکرٹری پنجاب زاہد اختر زمان کی منڈی بہاوالدین آمد، منڈی بہاوالدین تا سرائے عالمگیر روڈ سمیت مختلف ترقیاتی سکیموں کا افتتاح کیا۔چیف سیکرٹری نے شہر میں صفائی کیلئے خریدی گئی نئی مشینری کابھی افتتاح کیا اور بلدیہ ڈرائیورز میں چابیاں تقسیم کیں.

منڈی بہاوالدین( ایم.بی.ڈین نیوز یکم فروری 2024 ) اس موقع پر ڈپٹی کمشنر شاہد عمران مارتھ، ڈی پی اورضا صفدر کاظمی اور متعلقہ افسران موجود تھے۔ چیف سیکرٹری پنجاب نے کہا کہ وزیر اعلیٰ پنجاب محسن نقوی کی خصوصی ہدایت پر پنجاب بھر کے تمام اضلاع میں زیر التوا ترقیاتی منصوبوں کو مکمل کیا جا رہا ہے۔ عوامی فلاح و بہبود کے منصوبوں کی تکمیل اور عوام الناس کو بہترین میونسپل سروسز فراہم کرنے کا سلسلہ جاری رہے گا.

منڈی بہاوالدین تا سرائے عالمگیر روڈ 46 کلومیٹر طویل ہے اور منصوبے پر 6 ارب روپے سے زائد لاگت آئی ہے ۔ چیف سیکرٹری پنجاب کا کہنا تھا کہ منڈی بہاوالدین کے لوگوں کی سفری سہولیات کو مد نظر رکھتے ہوئے اس سڑک کو ریکارڈ مدت میں تعمیر کیا گیا ہے، سڑک کی تعمیرسے منڈی بہاوالدین، گجرات اور جہلم کے لوگوں کو بہترین سفری سہولیات میسر ہونگی۔