مری اور گلیات میں شدید برف باری کے بعد مختلف راستوں پر بدترین ٹریفک جام کے باعث سیاح، اہل خانہ اور بچے گاڑیوں میں پھنس کر رہ گئے۔ مری اور گلیات میں ڈیڑھ فٹ تک برفباری کے بعد مری ایکسپریس وے اور لوئر ٹوپہ تا سحر بگلہ ہائی وے پر شدید ٹریفک جام میں متعدد گاڑیاں پھنس گئیں۔
شدید برفباری کے باعث کئی گھنٹوں تک ٹریفک جام میں پھنسے سیاحوں نے مری ایکسپریس وے اور سری نگر ہائی وے پر ہنگامی اقدامات کی اپیل کی ہے۔ ترجمان پی ڈی ایم اے کا کہنا ہے کہ مری میں آج بارش اور برفباری کا سلسلہ جاری رہے گا۔ سیاحوں کو سہولیات فراہم کرنا انتظامیہ کی ذمہ داری ہے۔
ڈی سی اسلام آباد کا کہنا ہے کہ 17 میل مری سے مزید سیاحوں کا داخلہ بھی بند کر دیا گیا ہے۔ دوسری جانب لاہور، فیصل آباد، گجرات، جہلم اور منڈی بہاؤالدین سمیت پنجاب کے کئی علاقوں میں تیز ہواؤں اور گرج چمک کے ساتھ موسلا دھار بارش سے سردی کی شدت میں اضافہ ہو گیا ہے۔
آزاد کشمیر اور گلگت بلتستان کے مختلف علاقوں میں بارش اور برفباری کے باعث مختلف مواصلاتی راستے بند ہو گئے۔ محکمہ موسمیات نے اسلام آباد، پنجاب، بالائی خیبرپختونخوا، گلگت بلتستان اور کشمیر میں بارش اور پہاڑوں پر برفباری کی بھی پیش گوئی کی ہے۔
