ڈپٹی کمشنر شاہد عمران مارتھ نے کہا ہے کہ نمبرداری نظام کی از سر نو فعالیت موجودہ حکومت کا ایک انقلابی اقدام ہے، نمبردار ضلعی انتظامیہ کیلئے ریڑھ کی ہڈی کی حیثیت رکھتے ہیں، نمبرداری نظام کی بحالی کے بعد ضلعی انتظامیہ اور نمبرداروں نے مل کر عوام کی سماجی و معاشی ترقی اور فلاح و بہبود کیلئے کام کرنا ہے، نمبردار اپنے علاقے کے مسائل کی نشاندہی کر کے کسی بھی مسئلے کا بر وقت حل نکال سکتے ہیں۔
منڈی بہاوالدین( ایم.بی.ڈین نیوز 04 اکتوبر 2023 ) ان خیالات کا اظہار انہوں نے ڈپٹی کمشنر آفس میں نمبرداروں کے اجلاس کی صدارت کرتے ہوئے کیا۔ اجلاس میں بل آبیانہ کی ریکوری سمیت دیگر مسائل پر تفصیلی گفتگو کی گئی۔ اس موقع پر ایڈیشنل ڈپٹی کمشنر ریونیو ذوالفقار احمد، تحصیلدار و نائب تحصیلداران،ریونیو افسران کے علاوہ نمبرداران کی کثیر تعداد بھی موجود تھی ۔
اس موقع پر ڈپٹی کمشنر شاہد عمران مارتھ کا کہنا تھا کہ نمبرداری نظام کے تحت فرض شناس خلوص نیت سے فرائض اور ذمہ داریاں ادا کرنے والے افراد کو نمبرداری کی ذمہ داریاں سونپی گئی ہیں۔ اب یہ نمبرداروں کی بھی یہ بنیادی ذمہ داری ہے کہ وہ خلوص نیت سے متحرک ہو کر عوام الناس کے مسائل کی نشاندہی کریں اور انتظامیہ کے ساتھ مل کر ان کا مستقل حل نکالیں۔
