ایڈیشنل ڈپٹی کمشنر جنرل وقار اکبر چیمہ کی زیر صدارت ضلعی گندم مینجمنٹ کمیٹی، زرعی ایڈوائزری کمیٹی اور کسان کارڈز کے حوالے سے اجلاس منعقد ہوا۔
منڈی بہاوالدین(ایم.بی.ڈین نیوز 30اکتوبر 2024) اجلاس میں کھادوں کی حکومتی نرخوں پر دستیابی، کسان کارڈز کی تقسیم، زرعی گریجوایٹس انٹرن شپ پروگرام، نوجوان زرعی گریجویٹس پروگرام، وزیراعلیٰ پنجاب ایگریکلچر ٹرانسفارمیشن پلان، فارمر ٹریننگ پروگرام، انسداد سموگ سمیت کسان کارڈز کے حوالے سے مسائل سمیت گندم کا ہدف حاصل کرنے کیلئے اقدامات اور تجاویز پر تفصیلی گفتگو ہوئی۔
ڈپٹی ڈائریکٹر زراعت (توسیع ) شیخ محمد اقبال نے اجلاس کو بتایا کہ مارکیٹ میں معیاری کھادیں وافر مقدار میں موجود ہیں اور کھادوں کی کوئی قلت نہ ہے۔انہوں نے بتایا کہ وزیراعلیٰ پنجاب کسان کارڈز کیلئے 18ہزار 924 کسانوں کی رجسٹریشن کی جا چکی ہے اور ابتک ضلع بھر میں 7 ہزار 894کسانوں کو پنجاب کسان کارڈز بھی تقسیم کئے جا چکے ہیں.
کسان اپنی ضرورت کے تحت محکمہ زراعت اور بینک آف پنجاب کے 61نامزد کردہ ڈیلرز سے بلاسود گندم کی کاشت کے سلسلے میں کھاد بیج اور زرعی ادویات خرید رہے ہیں۔انہوں نے بتایا کہ وزیراعلیٰ پنجاب گرین ٹریکٹر سکیم کے تحت منڈی بہاءالدین کیلئے 161ٹریکٹرز سکیم کیلئے 20ہزار 666درخواستیں موصول ہو چکی ہیں اور جلد قرعہ اندزی کے ذریعے ٹریکٹرز تقسیم کئے جائیں گے ۔
شیخ محمد اقبال نے مذید بتایا کہ محکمہ زراعت (توسیع ) منڈی بہاءالدین کو ضلع میں3لاکھ 30 ہزار ایکڑ رقبہ پر گندم کی کاشت کرنے کا ہدف مقرر کیا گیا ہے۔انہوں نے بتایا کہ وزیراعلیٰ پنجاب گندم اگاﺅ پروگرام کے تحت 25ایکڑ سے زائد گندم کاشت کرنے والے کسانوں کو ایک ہزار ٹریکٹر ز جبکہ 12.5تا 25ایکڑ تک گندم کاشت کرنے والے کاشت کاروں کو ایک ہزار لیزر لینڈ لیولرز بذریعہ قرعہ اندازی تقسیم کئے جائیں گے۔
ایڈیشنل ڈپٹی کمشنر جنرل وقار اکبر چیمہ کا کہنا تھا کہ وزیراعلیٰ پنجاب مریم نواز شریف کسانوں کی فلاح و بہبود کیلئے ہمہ وقت کوشاں ہیں، انہوں نے کسانوں کی ترقی کیلئے 150ارب روپے کی خطیر رقم بلا سود قرضہ جات کیلئے کسان کارڈ کا اجراءکیا ہے جو کہ خوش آئند ہے۔ ایڈیشنل ڈپٹی کمشنر نے ڈپٹی ڈائریکٹر زراعت سمیت متعلقہ محکموں کے افسران کوکسانوں کے مسائل حل کرنے کی بھی ہدایت کی۔
