فیڈرل جوڈیشل اکیڈمی نے لاہور ہائیکورٹ کے 5 جوڈیشل افسران کی خدمات مانگ لیں۔ لاہور ہائی کورٹ کے ایڈیشنل سیشن جج منڈی بہاؤالدین محمد عامر منیر کو 20ویں سکیل پر تعینات کیا جائے گا۔
چیف جسٹس پاکستان نے بطور چیئرمین بورڈ آف گورنرز ہائی کورٹ کے افسران کی ڈیپوٹیشن پر خدمات مانگ لیں۔ ڈائریکٹر جنرل ہدایت علی شاہ نے جوڈیشل افسران کی خدمات کے لیے رجسٹرار لاہور ہائی کورٹ کو خط لکھ دیا۔
جاری کردہ مراسلہ میں کہا گیا کہ ایڈیشنل سیشن جج منڈی بہاؤالدین محمد عامر منیر کی خدمات 20ویں سکیل میں دی جائیں۔ ایڈیشنل سیشن جج افشاں اعجاز صوفی اور ندیم احمد سہیل کی خدمات 20ویں سکیل میں فراہم کی جائیں۔ ایڈیشنل سیشن جج جھنگ رائے محمد خان کو 20ویں سکیل میں ایڈیشنل ڈائریکٹر کی خدمات بھی دی جائیں۔
مراسلہ میں مزید کہا گیا کہ سول جج شازیہ منور مخدوم کو 19ویں سکیل میں ڈپٹی ڈائریکٹر کی خدمات فراہم کی جائیں۔
