منڈی بہاﺅالدین( ایم.بی.ڈین نیوز 03 اگست 2022) حکومت پنجاب کے احکامات کی روشنی میں ڈپٹی کمشنر عثمان خالد خان کی سربراہی میں ضلع بھر میں گراں فروشوں کے خلاف کاروائیاں روزانہ کی بنیاد پر جاری ہیں ۔
ڈپٹی کمشنر کی ہدایت پر ضلع بھر کے پرائس کنٹرول مجسٹریٹس نے عوامی شکایات کے ازالہ کے لیے مختلف دکانوں اور مارکیٹوں میں پھلوں، سبزیوں کی نیلامی، گوشت و کریانہ اشیاء کی قیمتوں اور آٹا، گھی اور چینی کی ذخیرہ اندوزی کی پڑتال کرتے ہوئے 533 انسپکشنز کیں اور غیر معیاری اشیائے خوردونوش کی فروخت اور ناجائز منافع خوروں کے خلاف کاروائی کرتے ہوئے 27 دکاندارں کو 61 ہزار 500 روپے کے جرمانے کئے گئے جبکہ ضلع بھر میں متعدد گوداموں اوردکانوںکو سیل بھی کیاگیا ہے۔
ڈپٹی کمشنر عثمان خالد خان کا کہنا ہے کہ حکومتی ہدایت کی روشنی میں تمام اشیائے خوردونوش بالخصوص آٹا، چینی ، دالیں، پھلوں، سبزیوں کے مقرر کردہ نرخوں پر عملدرآمد کیلئے ممکنہ اقدامات کو یقینی بنانا انتظامیہ کی اولین ترجیح ہے، ضلعی انتظامیہ ضروری اشیائے خوردونوش کی قیمتوں میں استحکام لانے کیلئے پوری طرح سنجیدہ ہے اورموجودہ حالات میں عوام الناس کو ریلیف پہنچانے کیلئے تمام وسائل بروئے کار لا رہی ہے۔
انہوں نے واضح کیا کہ اشیائے خوردونوش کی قیمتوں میں استحکام کو سوفیصد یقینی بنایا جائے گا، انجمن تاجران و کریانہ مرچنٹس ضلعی انتظامیہ کے ساتھ مل کر حکومت کی جانب سے اشیائے خوردونوش کی قیمتوں کو موثر بنانے کیلئے اپنا تعاون اور کلیدی کردار ادا کریں۔
