منڈی بہاﺅالدین( ایم.بی.ڈین نیوز 24اگست2022) ڈپٹی کمشنر تسنیم علی خاں نے کہا ہے کہ پولیو سے پاک پاکستان ہم سب کا اصل ہدف ہے، دنیا نے پولیو سے نجات حاصل کر لی ہے اب ہمیں اس کے خاتمے کیلئے قومی فریضہ کے طور پر اپنی تمام توانائیاں صرف کرنا ہوں گی۔
ان خیالات کااظہار انہوں نے ضلع بھر میں جاری انسداد پولیو مہم کے دوسرے روز کی کارکردگی کا جائزہ لینے کے حوالے سے منعقدہ اجلاس کی صدارت کرتے ہوئے کیا۔اجلاس میں ایڈیشنل ڈپٹی کمشنر ریونیو ملک عباس ذوالقرنین،سی ای او ہیلتھ ڈاکٹر افتخار، ڈسٹرکٹ ہیلتھ آفیسر ڈاکٹر شکیل نذر، ڈپٹی ڈی ایچ او ڈاکٹر خالد عباسی، ڈاکٹر فرخ، ایس این اے نبیل قادر ڈسٹرکٹ فوکل پرسن برائے ای پی آئی/ پولیو رافعہ ناہید، یونیسف کے نمائندے، پی اے ٹو سی او ہیلتھ ارسلان رﺅف کے علاوہ دیگر متعلقہ افسران بھی موجود تھے۔
اجلاس کوسی ای او ہیلتھ ڈاکٹر افتخار نے بتایا کہ انسداد پولیو مہم کے دوسرے روز پانچ سال تک کی عمر کے 99 ہزار 376 بچوں کو پولیو ویکسین کے قطرے پلائے گئے جبکہ ہدف ایک لاکھ 3 ہزار 921 مقرر کیا گیا تھا۔ اس طرح مجموعی کوریج 96 فیصد رہی ۔ جس پر ڈپٹی کمشنر نے کہا کہ پیدائش سے لے کر پانچ سال تک کی عمر کے ہر بچے کو پولیو ویکسین پلانے کے عمل کو سو فیصد یقینی بنایا جائے ۔
انہوں نے کہا کہ پولیو مہم کی کامیابی صحت مند پاکستان کی ضمانت ہے۔ قوم کے نونہالوں کو پولیو مرض سے محفوظ رکھنے اور انہیں مستقل معذوری سے بچانے کیلئے ضروری ہے کہ پانچ سال عمر کے ہر بچے کو انسداد پولیو ویکسی نیشن کے قطرے ضرور پلائے جائیں۔ انہوں نے فیلڈ میں مصروف عمل پولیو ٹیموں کو واضح ہدایات کرتے ہوئے کہا کہ وہ احساس ذمہ داری کا مظاہرہ کریں تا کہ ضلع کا پولیو فری سٹیٹس برقرار رکھا جا سکے۔
قبل ازیں ڈپٹی کمشنر نے انسداد پولیو مہم کے دوسرے روز حصہ لینے والی پولیوٹیموں کی انسپکشن کی۔انسپکشنز کے دوران انہوں نے انسداد پولیو مہم کے حوالے سے لگائے گئے کیمپوں کا دورہ کیا اورجھگیوں میں جا کر بچوں کی پولیو ویکسی نیشن کو چیک کیا ۔ انہوں نے محکمہ صحت بالخصوص انسداد پولیو ٹیموں کے افسران و اہلکاران کو مخاطب کرتے ہوئے کہا کہ عملی اقدامات سے ہی پولیو کا خاتمہ ممکن ہے۔محکمہ صحت کی ٹیمیں پولیو ویکسین کے قطرے پلانے کے علاوہ لوگوں کو شعورو آگاہی بھی فراہم کریں تاکہ وہ اپنے بچوں کو رضا کارانہ طور پر پولیو ویکسین کے قطرے پلوائیں۔
