وزیراعلی پنجاب مریم نوازشریف کے ویژن اور ڈپٹی کمشنر ڈاکٹر فیصل سلیم کی ہدایت پر سیکرٹری آر ٹی اے فریال نعیم روزانہ کی بنیاد پر فیلڈ میں مسلسل متحرک۔
منڈی بہاوالدین ( ایم.بی.ڈین نیوز 23 ستمبر 2024) آر ٹی اے سیکرٹری نے پٹرولیم مصنوعات کی قیمتوں میں کمی کے ثمرات عام عوام تک پہنچانے اور پبلک ٹرانسپورٹ کے کرایوں میں کمی کو یقینی بنانے کے حوالے سے مختلف روڈز پر چلنے والی گاڑیوں کو اچانک چیک کیا۔
انہوں نے مختلف گاڑیوں کے کرائے نامے چیک کئے اور عوام الناس سے کرایوں میں کمی کے حوالے سے بھی دریافت کیا۔ انہوں نے اوورچارجنگ اور گاڑیوں میں نئے کرائے نامے نمایاں جگہوں پر آویزاں نہ کرنے پر 9 گاڑیوں کے چالان کئے اور 7 گاڑیوں کو ضلع کے مختلف تھانہ جات میں بند کر دیا جبکہ 23 ہزار 500 روپے جرمانہ بھی عائد کیا۔
آر ٹی اے سیکرٹری نے 6500 روپے کرایہ بھی سفر کرنے والے مسافروں کو واپس کروایا۔ اس موقع پر سیکرٹری آر ٹی اے فریال نعیم کا کہنا تھا کہ حکومت کی جانب سے عوام الناس کو براہ راست ریلیف پہنچانے کیلئے پٹرولیم مصنوعات کی قیمتوں میں کمی کر کے سفری گاڑیوں کے کرایوں میں بھی کمی کی گئی ہے۔ ان کا کہنا تھا کہ زائد کرایہ وصول کرنے والوں کے خلاف روزانہ کی بنیاد پر کارروائیاں جاری رہیں گی۔
