ڈپٹی کمشنر شاہد عمران مارتھ کی ہدایت پر ذخیرہ اندوزی اور دوسرے اضلاع میں گندم کی سمگلنگ کے خلاف روزانہ کی بنیاد پر کارروائیاں جاری ہیں اور ضلع بھر میں گندم کی غیر قانونی نقل و حرکت کو روکنے کے لئے 18 چیک پوسٹیں قائم کی گئی ہیں جہاں پر کڑی نگرانی کی وجہ سے متعلقہ افسران نے مختلف نجی گوداموں، ڈیروں اور چیک پوسٹوں سے 18150 بیگز گندم کی غیر قانونی نقل و حرکت اور ذخیرہ اندوزی ناکام بنا دی۔
منڈی بہاﺅالدین( ایم.بی.ڈین نیوز 04مئی 2023) تفصیلات کے مطابق 5،900 بیگز گندم لسوڑی کلاں ،3ہزار بیگز ٹھٹھہ میر، 2 ہزار بیگز چھوراں والی، 2 ہزار بیگز کٹھیالہ خورد، ایک ہزار بیگز چک نمبر 7، 300بیگز چک نمبر 40، 250بیگز چک نمبر 20جبکہ مختلف گوداموں، ڈیروں اور چیک پوسٹوں سے 3ہزار بیگز گندم کو سرکاری تحویل میں لیا گیا۔
برآمد کی گئی گندم کو محکمہ فوڈ کے افسران کے حوالے کر کے سرکاری گوداموں میں منتقل کر کے قانونی کاروائی کا آغاز کر دیا گیا ہے۔ ڈپٹی کمشنر شاہد عمران مارتھ کا کہنا ہے کہ حکومت پنجاب کی ہدایات پر گندم خریداری کا 60 فیصد ٹارگٹ مکمل کر لیا گیا ۔ ان کا کہنا ہے کہ ضلع بھر میں گندم کی ذخیرہ اندوزی اور سمگلنگ کے خلاف کریک ڈائون جاری ہے اور کسی کو بھی گندم کی غیر قانونی طور پر ذخیرہ اندوزی اور سمگلنگ نہیں کرنے دی جائے گی۔
انہوں نے گندم کی غیر قانونی ذخیرہ اندوزی اور سمگلنگ کے کاروبار میں ملوث افراد کو خبردار کیا کہ وہ اس غیرقانونی کاروبار سے باز رہیں ورنہ بھاری جرمانوں کے ساتھ ساتھ جیل بھی بھیجا جائے گا اور گندم سرکاری تحویل میں لے لی جائے گی۔ ڈپٹی کمشنر کا کہنا ہے کہ گندم کی ذخیرہ اندوزی اور اسمگلنگ کے خلاف بلا امتیاز کارروائیاں جاری رہیں گی۔
