پنڈ دادن خان کے علاقے کالس بیلہ میں دریا عبور کرتے ہوئے 16 سالہ محمد علی دریائے جہلم کی موجوں میں بہہ گیا۔ اس کی لاش نکال کر ہسپتال منتقل کر دی گئی۔
جہلم کی تحصیل پنڈ دادن خان میں افسوسناک واقعہ پیش آیا جہاں 16 سالہ نوجوان دریائے جہلم میں ڈوب کر جاں بحق ہوگیا۔ یہ واقعہ تحصیل کے نواحی گاؤں قمر گاؤں کے قریب پیش آیا۔ جاں بحق نوجوان کی شناخت محمد علی نواز ولد نواز کے نام سے ہوئی ہے جو ضلع ساہیوال کا رہائشی بتایا جاتا ہے۔
عینی شاہدین اور ریسکیو 1122 کے مطابق محمد علی اپنے جانوروں کے ریوڑ کے ساتھ دریا عبور کر رہا تھا کہ اچانک تیز لہروں کی لپیٹ میں آ کر پانی میں بہہ گیا۔ دریا کے تیز بہاؤ اور گہرائی کے باعث وہ اپنا توازن برقرار نہ رکھ سکا اور نظروں سے اوجھل ہوگیا۔
یاد رہے کہ دریائے جہلم اور دیگر قدرتی آبی گزرگاہوں کے قریب حفاظتی اقدامات نہ ہونے کی وجہ سے ہر سال متعدد افراد حادثات کا شکار ہو جاتے ہیں۔ خاص طور پر مویشی چرانے والے نوجوان دیہاتی، جو عموماً حفاظتی اقدامات کے بغیر دریا کو پار کرتے ہیں، ایسے سانحات کا شکار ہو جاتے ہیں۔
حکومت اور مقامی انتظامیہ سے مطالبہ کیا جا رہا ہے کہ وہ حساس مقامات پر وارننگ بورڈز اور حفاظتی اقدامات کو یقینی بنائیں تاکہ مستقبل میں ایسے ناخوشگوار واقعات سے بچا جا سکے۔
