ڈائریکٹر اوورسیز پاکستانیز کمیشن پنجاب عاصم رضا کی زیر صدارت ڈسٹرکٹ اوورسیز پاکستانیز کمیٹی کا اجلاس ڈی سی آفس میں منعقد ہوا۔ اجلاس میں ڈپٹی کمشنر شاہد عمران مارتھ ، ڈی پی او رضا صفدر کاظمی، ایڈیشنل ڈپٹی کمشنر ریونیو ذوالفقار احمد ، اسسٹنٹ کمشنر منڈی بہاوالدین طارق محمود، اسسٹنٹ کمشنر ہیڈکوارٹر وحید حسن سمیت دیگر متعلقہ افسران نے شرکت کی۔
منڈی بہاﺅالدین(ایم.بی.ڈین نیوز 02مئی 2023 ) اجلاس میں اوورسیز پاکستانیوں کے مسائل جن میں اراضی پر قبضوں،مشترکہ راستوں پرآمدورفت میں رکاوٹ، جائیدادوں کی وراثتی تقسیم،رقوم کے لین دین، تجاوزات، دھوکہ دہی اور دیگر مسائل پر مشتمل 108 شکایات زیر بحث لائی گئیں، متعدد درخواستوں کے حل کیلئے موقع پر ہی احکامات جاری کر دئیے گئے جبکہ بقیہ کیسز سے متعلق مختلف محکموں کے افسران کو اپنی پراگریس رپورٹ اور بعض زیر التوا کیسزمیں فوری کاروائی کر کے رپورٹ پیش کرنے کی ہدایت کی گئی۔
اس موقع پر ڈائریکٹر اوورسیز پاکستانیز کمیشن پنجاب عاصم رضا نے کہاکہ پنجاب حکومت سمندر پار پاکستانیوں کو یہاں پر درپیش مشکلات کے حل اور انہیں تمام ممکنہ ریلیف فراہم کرنے کیلئے انتہائی سنجیدہ ہیں،بیرون ممالک میں مقیم پاکستانیز پاکستان کی شناخت اور سفیر ہیں ان کے مقامی سطح پرمسائل ترجیحی بنیادوں پر حل کئے جا رہے ہیں۔ انہوں نے افسران کو ہدایت کی کہ وہ اوورسیز پاکستانیز کے مسائل کے حل کرنے میں خصوصی دلچسپی لیں اوراعلیٰ حکام کی جانب سے احکامات پر عملدرآمد کو یقینی بنائیں۔
انہوں نے مزید ہدایت کی کہ اوورسیز پاکستانیز کو کیسز کے فیصلوں سے متعلق مکمل آگاہی بھی فراہم کی جائے۔ انہوں نے کہاکہ اوورسیز پاکستانیز کی شکایات کا فوری نوٹس لے کر بلا تاخیر محکمانہ اقدامات کو یقینی بنایا جائے۔ ڈپٹی کمشنر شاہد عمران مارتھ نے کہاکہ اوورسیز پاکستانیز کے مفادات کا تحفظ ہر صورت میں یقینی بنایا جائے گا۔ نا جائز قابضین اور دھوکہ دہی کے مرتکب افراد کو قانون کے شکنجے میں لایا جائے گا اور کسی فریق کے ساتھ نا انصافی نہیں ہونے دی جائے گی۔
