منڈی بہاﺅالدین ( ایم.بی.ڈین نیوز 21 مارچ 2021) ڈپٹی کمشنر طارق علی بسرا نے کہاہے کہ ترقیاتی سکیموں پر کام کی رفتار تیز کر کے مقررہ وقت پر پایہ تکمیل تک پہنچایا جائے، ترقیاتی منصوبوں پر فزیکل اور فنانشل پراگرایس رپورٹ حکومت کے علاوہ عوامی نمائندوں کے ساتھ شیئر کی جائے ،انہوں نے کہاکہ جن سکیموں کے فنڈز دستیاب ہیں ان کے کام میں کسی قسم کا تعطل نہ پیدا کیا جائے بلکہ ان کو تیزی سے مکمل کیا جائے۔
ان خیالات کا اظہار انہوں نے آج یہاں ڈی سی آفس میں ترقیاتی سکیموں میں پیش رفت کے حوالے سے ڈسٹرکٹ ڈویلپمنٹ کمیٹی کے اجلا کی صدارت کرتے ہوئے کیا۔ اجلاس میں ایڈیشنل ڈپٹی کمشنر فنانس حافظ غلام مرتضیٰ، سی ای او ایجوکیشن سید توقیر حسین شاہ، ڈی او بلڈنگ قرار شاہ، ایکسیئن روڈز اور دیگر متعلقہ محکموں کے افسران بھی موجود تھے۔اجلاس میں ضلع کے مختلف علاقوں میں عوامی نمائندوں کی مختلف سکیموں کی تکمیل کے حوالے سے متعلقہ مسائل ، ڈرین ، سکولوں میں عدم دستیاب سہولتوں ،سکولوں کی اپ گریڈیشن،کلاس رومز، باﺅنڈری وال، ٹف ٹائلز کی تنصیب جیسے مسائل زیر بحث آئے۔
ایڈیشنل ڈپٹی کمشنر فنانس حافظ غلام مرتضیٰ نے اجلاس کو ملٹی میڈیا کی مدد سے عوامی نمائندوں کی جاری ترقیاتی سکیموں کے حوالے سے بریفنگ دی ۔ جس پر ڈپٹی کمشنر نے متعلقہ افسران کو واضح ہدایات جاری کرتے ہوئے ہدایت کی کہ وہ روزانہ کی بنیاد پر جاری ترقیاتی سکیموں کو چیک کریںاور متعلقہ ادارے ذمہ داری کا مظاہرہ کرتے ہوئے ترقیاتی کاموں کی کوالٹی اور رفتاری پر خصوصی توجہ دیں کیونکہ جتنی جلدی ترقیاتی کام مکمل ہوں گے عوام الناس اتنی جلدی ہی ان سے مستفید ہوں گے۔انہوں نے کہاکہ محکمے شہری سہولیات کی فراہمی کو یقینی بنانے کیلئے منظم منصوبہ بندی کے تحت ٹیم ورک کے ساتھ ترقیاتی سکیموں کو جلد از جلد مکمل کریں ۔
انہوں نے کہا کہ ان میٹنگوں کا مقصدلاءاینڈ آرڈر، ترقیاتی اسکیموں اور ہیلتھ ایجوکیشن کے حوالے سے پارلیمنٹیرین کے ساتھ ان ترقیاتی اسکیموں کا اپ ڈیٹ شیئر کرنا اوران کی تجاویز کی روشنی میں ترقیاتی اہداف کو حاصل کرنا ہے۔ انہوں نے کہا کہ وزیراعلیٰ پنجاب سردار عثمان بزدار کی زیر قیادت حکومت ترقیاتی اسکیموں کی تکمیل کیلئے ہر ممکن وسائل مہیا کررہی ہے اور اس سلسلے میں ان ترقیاتی اسکیموں کے اجراء،اپ گریڈیشن اورتعمیر و بحالی کیلئے فنڈز مختص ہیں۔انہوں نے افسران پر واضح کیا کہ ترقیاتی اسکیموں کے کام کے معیار،رفتاراورشفافیت پر کسی قسم کا سمجھوتہ نہیں کیا جائیگا۔ انہوں نے افسران پر زور دیا کہ تمام ترقیاتی اسکیموں کو مفاد عامہ کے پیش نظر جلد از جلد پایہ تکمیل تک پہنچایا جائے تاکہ عوامی خواہشات کے مطابق یہ ترقیاتی اسکیمیں لوگوں کی سہولت کا باعث بنیں اور لوگ ان سے بھرپور استفادہ حاصل کر سکیں۔
