ایڈیشنل ڈپٹی کمشنر ریونیو ڈاکٹر احسان الحق ضیاء نے کہا ہے کہ ریو نیو عوامی خدمت کچہری وزیراعلیٰ پنجاب کا عوام دوست اقدام ہے جہاں شہریوں کے ریونیو سے متعلق پیچیدہ مسائل فور ی حل ہوتے ہیں.
منڈی بہاوالدین( ایم.بی.ڈین نیوز یکم اپریل 2022) انہوں نے کہاکہ ان عوامی خدمت کچہریوں میں ریونیو عملہ عوام الناس کی سہولت کے لیے فرد کے اجراء، درستگی ریکارڈ، انتقالات کے اجراء، انکم سرٹیفکیٹ، معائنہ ریکارڈ، رجسٹری، ڈومیسائل کا اجراءاور ریونیو سے متعلقہ دیگر درپیش مسائل کے حل کے حوالے سے ایک ہی چھت کے نیچے الگ الگ کاﺅنٹرز پر خدمات مہیا کرنے کیلئے موجود ہوتا ہے یہی وجہ ہے عوام الناس کی کثیرتعداد نے ان خدمت کچہریوں پر اپنے بھر پور اعتماد کا اظہار کیا ہے۔
ان خیالات کا اظہار انہوں نے ڈپٹی کمشنر آفس میں منعقدہ ریونیو عوامی خدمت کچہری میں سائلین کی شکایات کو سن کر موقع پر حل کرتے ہوئے کیا۔ اس موقع پر اسسٹنٹ کمشنر منڈی بہاﺅالدین کاشف جلیل، نائب تحصیلدار وقار احمد، لینڈ ریکارڈ سنٹر اور ریونیو افسران کے علاوہ سائلین کی کثیر تعداد بھی موجود تھی۔
ایڈیشنل ڈپٹی کمشنر نے عوامی خدمت کچہری میں آئے ہوئے سائلین سے خود بھی توجہ اور خلوص سے ان کے مسائل سنے اور ان کے حل کے لئے موقع پر احکامات جاری کئے۔ اس موقع پر انہوں نے کہا کہ شہریوں کو ریونیو سے متعلقہ مسائل کے حل کے حوالے سے یہ خدمات ہر ماہ کے پہلے ہفتے کے دفتری دن کو صبح 10بجے سے سہ پہر 4 بجے تک مہیا کی جاتی ہیں۔
انہوں نے کہا کہ کھلی کچہری میں پیش کی جا نے والی درخواستوں کا مکمل ریکارڈ رکھا جاتا اور سخت مانیٹرنگ کی جا تی ہے، خدمت کچہری میں آغاز سے لیکر اختتام تک آنے والے سائلین نے اپنے مختلف مسائل کے حوالے سے درخواستیں پیش کیں جنہیں وہاں پر افسران کی موجودگی میں عملہ نے فوری طور پر کاروائی کر کے موقع پر نبٹا دیا جبکہ دیرینہ مسائل والی درخواستوں کو ایک دو روز میں حل کرنے کی یقین دہانی کروائی گئی۔
