ایڈیشنل ڈپٹی کمشنر ریونیو ڈاکٹر احسان الحق ضیاء نے ڈسٹرکٹ ایمرجنسی ریسپانس کمیٹی برائے انسداد ڈینگی کے حوالے سے منعقدہ اجلاس کی صدارت کرتے ہوئے کہا ہے کہ ڈینگی ایک سماجی اور قومی مسئلہ ہے اور اس مرض کے لاحق ہونے سے مریض خطرناک مرض میں مبتلا ہو جاتا ہے اس لئے محکمہ صحت کے علاوہ تمام متعلقہ محکموں پر بھاری ذمہ داری عائد ہوتی ہے کہ وہ ڈینگی کے خاتمے کیلئے سنجیدہ کوششیں کریں۔
منڈی بہاوالدین( ایم.بی.ڈین نیوز 16 جون 2022 ) قبل ازیں سی او ہیلتھ ڈاکٹر محمد الیاس گوندل نے اجلاس کوبریفنگ دیتے ہوئے بتایا کہ 06 جون تا 11 جون 2022 کی کاروائی کے مطابق ہاٹ سپاٹ جگہوں کی چیکنگ کے دوران04 لاروے پائے جانے پر فوری طور پر مکینیکل لاروا سائیڈنگ کر دی گئی جبکہ سو فیصد تھرڈ پارٹی ویلیڈیشن بھی کر دی گئی۔
انہوں نے بتایا کہ ایک ہفتے کے دوران 518 ٹیموں نے ان ڈور 80 ہزار 825 گھروں کو چیک کیا گیا ہے جبکہ 65 ٹیموں نے آﺅٹ ڈور 10 ہزار 140 گھروں کو چیک کیا۔اسی طرح ان ڈور سرویلینس کے تحت3 لاکھ 18 ہزار 316 کنٹینرز چیک کئے گئے جبکہ آﺅٹ ڈور سرویلینس کے تحت36 ہزار 606 کنٹینرز چیک کئے گئے اور ہاٹ سپاٹ کوریج سوفیصد رہی۔
انہوں نے بتایا کہ انسداد ڈینگی کے حوالے سے حفاظتی اقدامات نہ کرنے پر 529 نوٹسز بھی جاری کئے گئے ہیں ۔ جس پر ایڈیشنل ڈپٹی کمشنر نے کہا کہ محکمہ صحت کی انسداد ڈینگی ٹیمیں ان ڈور، آوٹ ڈور سرویلنس کے کام میں مزید بہتری لائیں کیونکہ منڈی بہاﺅالدین کو ڈینگی فری بناناضلعی انتظامیہ کی اولین ترجیح ہے۔
انہوں نے افسران کو ہدایت کی کہ سرکاری محکموں کے ساتھ ساتھ عوام الناس میں بھی ڈینگی کے حوالے سے آگاہی مہم تیز کی جائے اور آگاہ کیا جائے کہ وہ اپنے گردونوح کو صاف ستھرا رکھیں اور احتیاطی تدابیر اختیار کریں تاکہ ڈینگی مچھر کی افزائش کو روکا جا سکے۔
بعد ازاں ایڈیشنل ڈپٹی کمشنر ڈاکٹر احسان الحق ضیاء نے ای پی آئی ویکسی نیشن مہم کی کارکردگی کے حوالے سے منعقدہ اجلاس کی صدارت کرتے ہوئے کہا کہ ای پی آئی ویکسی نیشن کی کامیابی کیلئے پوری محنت اور لگن کے ساتھ کام کیا جائے، گزشتہ مہموں کے دوران پیش آنے والے مسائل کا از سر نو جائزہ لے کو مسائل حل کر کے مہم کو اہداف کے مطابق کامیاب بنایا جائے اور اس حوالے سے کسی قسم کی کوتاہی کو ہر گز برداشت نہیں کیا جائے گا۔
اس موقع پر سی او ہیلتھ ڈاکٹر محمد الیاس گوندل نے اجلاس کو بتایا کہ ضلع منڈی بہاﺅالدین میں ای پی آئی ویکسی نیشن کے تحت پیدائش کے وقت سے لے کر 15ماہ تک کی عمر کے بچوں کو مختلف وقفوں کے دوران پیدائش کے وقت ، 6 ہفتے ،10ہفتے ،14ہفتے، 9ماہ اور 15 ماہ تک کے دوران بچوں کو 6 دفعہ ویکسین دی جاتی ہے ۔
ان ویکسین سے بچے تپ دق، پولیو، خناق، نمونیہ، کالی کھانسی،کالا یرقان، گردن توڑ بخار، اسہال، تشنج اور خسرہ جیسی بیماریوں سے محفوظ رہ سکتے ہیں۔ ایڈیشنل ڈپٹی کمشنر نے ای پی آئی ویکسی نیشن کی کارکردگی کا جائزہ لیتے ہوئے سی ای او ہیلتھ ڈاکٹر محمد الیاس گوندل اور ان کی ٹیم کی کارکردگی کو سراہتے ہوئے ان کے کام کی تعریف کی ۔
اجلاس میں ڈی ایچ اوز ڈاکٹر محمد افتخار، ڈاکٹر شکیل اقبال بٹ، ڈپٹی ڈی ایچ اوڈاکٹر خالد عباسی،میڈیکل سپرنٹنڈنٹس ڈاکٹر قمرالزمان، فوکل پرسن انسداد پولیو /ای پی آئی رافعہ ناہید ،ڈی او ماحولیات عاطف عمران ، پی اے ٹو سی او ہیلتھ ارسلان رﺅف اور دیگر متعلقہ محکموں کے افسران بھی موجود تھے۔
