وزیراعلیٰ پنجاب سردار عثمان بزدار کی خصوصی ہدایت پر ضلع بھر میں عشرہ شان رحمت اللعالمین کے سلسلہ میں تقریبات مذہبی جوش و خروش سے جاری ہیں، محکمہ سوشل ویلفیئر اور المصطفیٰ ویلفیئر سوسائٹی پھالیہ کے زیر اہتمام محفل نعت اور میلاد کا انعقاد کیا گیا ۔ جس میں معروف نعت خواں اور مشائخ عزام مہمان خصوصی تھے۔
منڈی بہاﺅالدین( ایم.بی.ڈین نیوز 13 اکتوبر 2021)تقریب کا آغاز تلاوت کلام پاک سے کیا گیا، محفل نعت میں معروف نعت خوانوں اور شعراءکرام نے نبی کریم ﷺکی شان اقدس میں نعت کی شکل میں گلہائے عقیدت پیش کئے اور میلاد کے حوالے سے حضور اقدس ﷺ کی بارگاہ میں عقیدت درود و سلام پیش کیا گیا ۔ اس موقع پر محفل میں شریک عزام مشائخ نے شرکاءسے خطاب کرتے ہوئے کہا کہ ماہ ربیع الاول مسلمانوں کیلئے باعث رحمت اور باعث سعادت ہے اس با برکت مہینے کو عقیدت و احترام سے منایا جا رہا ہے۔
انہوں نے کہاکہ بے شک نبی اکرم ﷺ کی سیرت اور صورت دونوں بے مثال ہیں ۔ انہوں نے واضح کیا کہ نبی اکرم ﷺ کے بتائے ہوئے راستے پر چلنا اور ان سے محبت کرنا ہمارے ایمان کا حصہ ہے ۔ انہوں نے بتایا کہ نبی کریم ﷺ کی بعثت سے قبل دنیا سماجی و معاشرتی برائیوں میں ڈوبی ہوئی تھی۔ آپ ﷺ کی بعثت اور آمد نے معاشرے کو جہالت اور گمراہی سے نجات دلائی۔
انہوں نے کہاکہ سیرت طیبہ پر عملدرآمد سے ہی دنیا اور آخرت میں کامیابی ہے ۔انہوں نے واضح کیا کہ حکومتی سطح پرعشرہ رحمت اللعالمین کو منانے کا مقصد موجودہ اور آنے والی نسلوں کو نبی اکرم ﷺ کی تعلیمات، سیرت طیبہ اور اسلامی اقدار سے روشناس کرانا ہے تا کہ مملکت خداد پاکستان کو صحیح معنوں میں ریاست مدینہ کی عملی شکل دی جا سکے۔
