ڈپٹی کمشنر عثمان خالد خان کی ہدایت پر اسسٹنٹ کمشنرمنڈی بہاوالدین کاشف جلیل کی سربراہی میں کسانوں اور کاشتکاروں کو یوریا کھاد کی فراہمی کا سلسلہ جاری ہے ۔ اسسٹنٹ کمشنر نے کسانوں کو مقررہ قیمت پر کھادوں کی فراہمی کو چیک کرنے کے حوالے سے سیل پوائنٹ غلہ منڈی کا دورہ کیا۔
منڈی بہاوالدین( ایم.بی.ڈین نیوز 25 جون 2022) انہوں نے کھاد ڈیلرز کے ریکارڈز کو چیک کیا اور کسانوں کو یوریا کھاد کی فراہمی کے عمل کا بھی جائزہ لیا۔ انہوں نے کاشت کاروں سے کھاد کی فراہمی کے حوالے سے بھی استفسار کیا اوراطمینان کا اظہار کیا۔ اسسٹنٹ کمشنر نے کھاد ڈیلروں کو ہدایت کی کہ وہ کھاد کے مقررکردہ نرخ بل بورڈ پر نمایاں جگہوں پر آویزاں کریں اور کھادوں کے سٹا ک کا ریکارڈ رکھیں۔
یہ بھی پڑھیں: پھالیہ:کھاد کی عدم دستیابی ،کسانوں نے احتجاج کا اعلان کردیا
اس موقع پر ڈپٹی ڈائریکٹر زراعت (توسیع) شیخ محمد اقبال اور دیگر متعلقہ افسران اور کسانوں کی کثیر تعداد بھی موجود تھی۔اسسٹنٹ کمشنر کو معیاری کھادوں کی مقررہ قیمتوں پر فراہمی کے حوالے سے بتایا گیا کہ مارکیٹ میں کھاد کی کوئی قلت نہیں ہے اور کھاد وافر مقدار میں دستیاب ہے، اسسٹنٹ کمشنر کو مذید بتایا گیا کہ مارکیٹ میں 50 کلو گرام یوریا بیگ 1950 روپے میں دستیاب ہے اور کھاد ڈیلرز کو پابند کر دیا گیا ہے کہ وہ کسانوں کو سرکاری قیمت پر کھاد کی فراہمی کو یقینی بنائیں گے۔
جس پراسسٹنٹ کمشنر نے کہاکہ زراعت ملکی معیشت میں ریڑھ کی ہڈی کی حیثیت رکھتی ہے، کسان کو سہولتیں فراہم کئے بغیر زرعی شعبے میں ترقی کا خواب شرمندہ تعبیر نہیں کیا جا سکتا۔ انہوںنے کہاکہ حکومت کھادوں کی سمگلنگ اور غیر قانونی زخیرہ اندوزی کی روک تھا م کیلئے تمام تر وسائل بروکار لائے جا رہے ہیں ۔
حکومتی پالیسی کے تحت کاشتکاروں کے مفاد کا بھر پور تحفظ کرتے ہوئے کسی کو بھی مہنگی کھاد بیچنے اور ذخیرہ اندوزی کی ہر گز اجازت نہیں دی جائے گی۔ ایسی شکایات موصول ہونے پر پرائس ایکٹ کے تحت جرمانے کے ساتھ گرفتاری بھی عمل میں لائی جائے گی۔
