حکومت پنجاب کی ہدایت پر ضلع منڈی بہاﺅالدین کی تینوں تحصیلوں میں شان رحمت اللعالمین منانے کے حوالہ سے روزانہ تقریبات کا سلسلہ جاری ہے ، اے سی آفسز، تحصیل میونسپل کمیٹی منڈی بہاﺅالدین اور تحصیل میونسپل کمیٹی پھالیہ کو لائٹنگ سے سجا دیا گیا ہے جبکہ شہر کے چوکوں اور بازاروں میں شان رحمت اللعالمین کی مناسبت سے قد آور ہورڈنگ بورڈز اور فلیکسز بھی لگا دی گئی ہیں ۔
منڈی بہاﺅالدین( ایم.بی.ڈین نیوز 09 اکتوبر 2021)وزیر اعلیٰ پنجاب سردار عثمان بزدار کے احکامات کی روشنی میں پنجاب بھر کی طرح میونسپل کمیٹی منڈی بہاﺅالدین اور پھالیہ میں بھی شان رحمت اللعالمین جاری ہے جس میں روزانہ مختلف مکاتب فکر سے تعلق رکھنے والے علمائے کرام سرکار دو جہاں فخر موجودات کی شان اقدس پر منعقدہ تقریبات سے خطاب کر رہے ہیں۔ اسی موقع کی مناسبت سے اسسٹنٹ کمشنر منڈی بہاﺅالدین امتیاز علی بیگ اور اور اسسٹنٹ کمشنر پھالیہ ساجد منیر کلیار نے اپنے پیغام میں کہا ہے کہ اللہ تعالیٰ نے نبی کریم ﷺ کو رحمت اللعالمین بنا کر بھیجا جن کے اسوہ حسنہ کی کامل پیروی و اتباع کر کے ہم دنیا و آخرت میں کامیابی حاصل کر سکتے ہیں۔
انہوں نے کہا کہ ہمیں اس بات کا عہد کرنا ہو گا کہ ہم اپنی زندگیوں کو تعلیما ت نبوی کے عین مطابق گزاریں گے تا کہ ہم دنیا و آخرت میں سر خرو ہو سکیں۔ اسسٹنٹ کمشنر ز نے کہا کہ نبی کریم کا اصل پیغام اور مدعا یہ ہوناچاہئیے کہ ہم اسوہ رسول پاک سے رہنمائی لے کر اپنی صفوں میں اتحاد اور ایمانی قوت پیدا کریں تاکہ تمام طاغوتی اور اسلام دشمن طاقتوں کو منہ توڑ جواب دیا جاسکے۔اے سیز نے کہا کہ نبی کریم کی ولادت کاکا دن ہم سب کیلئے سب سے زیادہ مقدس ومحترم ہے کیونکہ اس دن ہمارے پیارے نبی اکرم ﷺ کی ولادت با سعادت ہوئی ۔ اس کی جتنی بھی خوشی منائیں، کم ہے۔ انہوں نے کہا کہ آپ ﷺ کی اسوہ حسنہ ہمارے لئے مشعل راہ ہے جس پر چل کر ہم انسانیت کی معراج کو پہنچ سکتے ہیں۔
https://mbdinnews.com/archives/64490
