ڈپٹی کمشنر محمد شاہد نے کہا ہے کہ موجودہ حکومت کی اولین ترجیح عوام الناس کی فلاح وبہبود کیلئے کام کرنا ہے جس کیلئے تمام متعلقہ محکمے ذمہ داری کا مظاہرہ کریں کیونکہ جتنی جلدی ترقیاتی منصوبہ جات مکمل ہوں گے عوام اتنا ہی جلد مستفید ہو گی، اگر کسی جگہ فنڈز کی کمی بیشی یا دیگر رکاوٹیں حائل ہیں تو ان کو اعلیٰ حکام کے نوٹس میں لا کر فوراً ترقیاتی اسکیموں کو مکمل کیا جائے۔
منڈی بہاﺅلدین( ایم.بی.ڈین نیوز 27 دسمبر 2021) ان خیالات کا اظہا ر انہوں نے آج یہاں ڈی سی آفس میں ترقیاتی منصوبوں میں پیش رفت کے حوالے سے اجلاس کی صدارت کرتے ہوئے کیا۔ اجلاس میں ایڈیشنل ڈپٹی کمشنر فنانس حافظ غلام مرتضیٰ،سی ای او ہیلتھ ڈاکٹر محمد الیاس گوندل، سی ای او ایجوکیشن محمد یاسین ورک، اہکسئین ہائے وے، روڈز، ایم اینڈ آر، بلڈنگ قرار شاہ ، تینوں تحصیلوں کے سی اوز کے علاوہ متعلقہ محکموں کے ضلعی افسران بھی موجود تھے۔
ایڈیشنل ڈپٹی کمشنر فنانس حافظ غلام مرتضیٰ نے اجلاس کو ملٹی میڈیا کی مدد سے ضلع میں جاری میگا پراجیکٹس اور ترقیاتی سکیموں کے حوالے سے بریفنگ دیتے ہوئے بتایا کہ اے ڈی پی ترقیاتی پروگرام 2021-22 کے تحت 7115.198 ملین روپے لاگت کی منظور شدہ 33سکیموں جن میں PHED کی13، روڈز کی 6، پبلک بلڈنگ، پرائمری اینڈ ہیلتھ کیئر، لوکل گورنمنٹ کی 2،2، ایریگیشن 3، سپورٹس 4 جبکہ ہائیر ایجوکیشن کی ایک جاری ترقیاتی سکیموں کا72 فیصد کام مکمل ہو چکا ہے۔
انہوں نے بتایا کہ ان سکیموں کیلئے 500.530 ملین روپے کی لاگت کے فنڈز ریلیز ہو چکے ہیں اور ان ریلیز فنڈز میں سے 303.221 ملین روپے استعمال ہو چکے ہیں۔ انہوں نے مزید بتایا کہ اے ڈی پی نیو کی 81سکیمیں جن کی مالیت 14955.764 ملین روپے روپے ہے ، ان سکیموں کیلئے 2034.329 ملین روپے کے فنڈز ریلیز ہو چکے ہیں اور ان ریلیز فنڈز سے 1111.767 ملین روپے کے فنڈز استعمال کئے جا چکے ہیں۔
اے ڈی سی فنانس نے بتایا کہ سیپ 3 کی 234 سکیمیں جن کی مالیت 149.990 ملین روپے ہے جن میں سے 35 سکیمز مکمل ہیں اور بقیہ تکمیل کے مراحل میں میں ۔جس پر ڈپٹی کمشنر محمد شاہد نے واضح ہدایات جاری کرتے ہوئے کہاکہ متعلقہ افسران روزانہ کی بنیاد پر جاری ترقیاتی سکیموں کو چیک کریں اور ادارے ذمہ داری کا مظاہرہ کرتے ہوئے ترقیاتی سکیموں کی کوالٹی، رفتار اور شفافیت پر خصوصی توجہ دیں، جو سکیمیں کم فنڈز سے مکمل ہوتی ہیں ان کے کام اور فنڈنگ میں کسی قسم کا تعطل پیدا نہ کیا جائے بلکہ ان کو تیزی سے مکمل کیا جائے۔
انہوں نے کہاکہ وہ ان جاری ترقیاتی سکیموں کو خود بھی چیک کریں گے۔ ڈپٹی کمشنر نے کہا کہ حکومت ترقیاتی اسکیموں کی تکمیل، اپ گریڈیشن اور تعمیر و بحالی کیلئے فنڈز مہیا کررہی ہے لہذا تمام ترقیاتی اسکیموں کو مفاد عامہ کے پیش نظر جلد از جلد پایہ تکمیل تک پہنچایا جائے تاکہ عوامی خواہشات کے مطابق یہ ترقیاتی اسکیمیں لوگوں کی سہولت کا باعث بنیں اور لوگ ان سے بھرپور استفادہ حاصل کر سکیں۔
