منڈی بہاءالدین سرکل آفیسر اینٹی کرپشن کی کرپشن کے خلاف بھرپور کاروائیاں، سرکاری واجبات کی وصولیوں میں بے قاعدگیوں پر رجسٹری محررز کے خلاف مقدمہ درج کروا دیا۔
تفصیلات کے مطابق درخواست گزار احمد وقار ولد محمد امجد، ساکن واسو روڈ نے محکمہ اینٹی کرپشن منڈی بہاءالدین میں درخواست دی کہ رجسٹری محررز حسن اور ریاست سمیت دیگر فراد نے ایف بی آر ٹیکس وصولیوں کی مد میں پھالیہ ملکوال اور منڈی بہاءالدین میں کروڑوں روپے وصولیوں کے باوجود سرکاری خزانہ میں جمع نہ کروائے ہیں۔
جس پر محکمہ اینٹی کرپشن کی جانب سے سپیشل آڈٹ کروایا گیا اور سپیشل آڈٹ انسپکشن آف مجاریہ ایف بی آر کی رپورٹ میں یہ بتایا گیا کہ پھالیہ، ملکوال اور منڈی بہاءالدین میں 9 کروڑ 70 لاکھ 14 ہزار 894 روپے وصولیوں کے باوجود سرکاری خزانہ میں جمع نہ کروائے گئے ہیں اور سرکاری خزانہ کو بھاری نقصان پہنچایا گیا ہے،
جس پر محکمہ اینٹی کرپشن نے فوری کاروائی کرتے ہوئے رجسٹری محررز حسن اور ریاست سمیت دیگر افراد کے خلاف تھانہ میں مقدمہ کے اندراج کیلئے استغاثہ جمع کروا دیا ہے۔ اس موقع پر سرکل آفیسر اینٹی کرپشن مرزا عمران الحق کا کہنا تھا کہ اسسٹنٹ ڈائریکٹر اینٹی کرپشن کی سربراہی میں اینٹی کرپشن منڈی بہاءالدین تسلسل سے بھرپور کاروائیاں جاری رکھے ہوئے ہے۔
ان کا کہنا تھا کہ اینٹی کرپشن اس کیس کی بھرپور پیروی کر کے ملزمان کو قرار واقعی سزا دلوائے گا اور سرکاری واجبات کی وصولیوں میں خردبرد پر کسی قسم کا کوئی سمجھوتہ نہ کیا جائے گا۔
