منڈی بہاﺅالدین( ایم.بی.ڈین نیوز 16 اگست2021 ) ایڈیشنل ڈپٹی کمشنر جنرل محمد شفیق نے کہا ہے کہ مون سون سیزن میں ہاٹ سپاٹ جگہوں کی مستقل بنیادوں پر لارا سائیڈنگ کی جائے تا کہ ڈینگی کی افزائش ممکن نہ ہو سکے، انہوں نے کہا کہ انسداد ڈینگی سرگرمیوں میں کسی قسم کی سستی اور غفلت ہر گز گنجائش نہیں ہے، فیلڈ ٹیمیں اپنی کاروائیوں کے دوران اینڈرائیڈ فون کا استعمال کریں اوراپنی سرگرمیوں کو ڈیش بورڈ پر اپ لوڈ کریں ۔
ان خیالات کا اظہار انہوں نے آج یہاں ڈی سی آفس میں ڈسٹرکٹ ایمرجنسی ریسپانس کمیٹی برائے انسداد ڈینگی مہم کے حوالے سے منعقدہ اجلاس کی صدارت کرتے ہوئے کیا۔ اجلاس میں ڈی ایچ او ڈاکٹر محمد افتخار، میڈیکل سپرنٹنڈنٹ ٹی ایچ کیو پھالیہ ڈاکٹر بشریٰ چوہدری، میڈیکل سپرنٹنڈنٹ ٹی ایچ کیو ملکوال ڈاکٹر ناصر وقار، ڈپٹی ڈائریکٹر سوشل ویلفیئر اینڈ بیت المال عاطف علی وڑائچ، ڈسٹرکٹ پاپولیشن ویلفیئر آفیسر ابوالحسن مدنی، ڈسٹرکٹ ایجوکیشن آفیسر یاسین ورک، فیلڈ آفیسر ماحولیات عاطف عمران ، ڈسٹرکٹ فوکل پرسن برائے پولیو/ ای پی آئی رافعہ ناہید، پی اے ٹو سی او ہیلتھ ارسلان رﺅف کے علاوہ دیگر متعلقہ محکموں کے افسران بھی موجود تھے۔
قبل ازیں ڈسٹرکٹ ہیلتھ آفیسر ڈاکٹر محمد افتخار نے اجلاس کو ان ڈور، آﺅٹ ڈور ڈینگی سرویلنس،ڈینگی سپرے ، انسداد ڈینگی سے متعلق ادویات کے سٹاک، ڈینگی لاروا سائیٹس کے معائنہ کے حوالے سے بریفنگ دیتے ہوئے بتایا کہ اس ہفتے کی کاروائی کے مطابق ہاٹ سپاٹ جگہوں کی چیکنگ کے دوران لاروے پائے جانے پر فوری طور پر مکینیکل لاروا سائیڈنگ کر دی گئی ہے ۔ انہوں نے بتایا کہ ضلع بھر میں ابھی تک ڈینگی کا کوئی مریض رپورٹ نہیں ہوا۔
ڈاکٹر محمد افتخار نے بتایا کہ ایک ہفتے کے دوران 518 ٹیموں نے ان ڈور96 ہزار375 گھروں کو چیک کیا گیا ہے جبکہ آﺅٹ ڈور 11 ہزار880 گھروں کو چیک کیا۔اسی طرح ان ڈور سرویلینس کے تحت 4 لاکھ16 ہزار949 کنٹینرز چیک کئے گئے جبکہ آﺅٹ ڈور سرویلینس کے تحت52 ہزار577 کنٹینرز چیک کئے گئے اور ہاٹ سپاٹ کوریج 100 فیصد رہی۔انہوں نے بتایا کہ انسداد ڈینگی کے حوالے سے حفاظتی اقدامات نہ کرنے پر803 نوٹسز بھی جاری کئے گئے ہیں ۔
بریفنگ سننے کے بعد ایڈیشنل ڈپٹی کمشنر محمد شفیق نے کہا کہ ڈینگی کا خاتمہ حکومت کی اہم ترجیح ہے۔انہوں نے محکمہ صحت کے افسران کو واضح ہدایات جاری کرتے ہوئے کہا کہ وہ مون سون سیزن میں انسداد ڈینگی سے متعلق ان ڈور ،آﺅٹ ڈور سرویلنس کے کام میں مذید بہتری لائیں اور اس کے نتائج کی روشنی میں لاروا سائیڈنگ کاکام بھر پور طریقے سے مستقل بنیادوں پر جاری رکھیں تاکہ کسی بھی طرح ڈینگی کی افزائش ممکن نہ ہوسکے۔
محمد شفیق نے کہاکہ ڈینگی مچھر کے خاتمے کیلئے سرکاری محکموں کے ساتھ کمیوننٹی کو بھی اپنا کردار ادا کرنا ہوگا۔ کمیوننٹی کے عملی تعاون کے بغیر مچھروں کی افزائش گاہوں کا خاتمہ ممکن نہیں بالخصوص گھروں،گلی محلوں ، قبرستانوں ، کباڑخانوں، ٹائر شاپس، جوہڑوں اور زیر تعمیر عمارتوں میں مچھروں کی افزائش کو روکنے کیلئے کمیونٹی موبلائزیشن کیلئے شعور اور آگاہی کی ضرورت ہے اس سلسلہ میں محکمہ صحت کی سرویلنس ٹیمیں گھر گھر جاکر ڈینگی کے خاتمہ کیلئے شہریوں کو ترغیب دیں اور ماحول کو صاف رکھنے کے سلسلے میں معلومات فراہم کرنے کے ساتھ ساتھ اپنی سماجی ذمہ داریوں کا احساس دلائیں۔
