انتظامیہ کی غفلت اور لاپرواہی نے شہر کی سڑکوں کو ندی نالوں میں تبدیل کردیا، سڑکوں پر پانی نے ڈیرے ڈال لئے اور متعلقہ محکمے لمبی تان کر سو گئے
منڈی بہاءالدین ( ایم.بی.ڈین نیوز 24 جنوری 2022) منڈی بہاءالدین میں دو دن سے جاری بارش کے دوران نکاسی آب کے ناقص انتظامات نے شہر کی مختلف مرکزی سڑکوں اور گذرگاہوں کو ندی نالوں میں تبدیل کردیا، سڑکیں جھیلوں کا منظر پیش کررہی ہیں،رحمان پورہ، جیل روڈ، رسول روڈ، واسو روڈ، نور پور گجراں روڈ، ارشد آباد سمیت مختلف نواحی آبادیوں میں پانی جمع ہوجانے سے علاقہ مکین اذیت ناک صورتحال سے دوچار ہیں.
گھروں میں پانی داخل ہورہا ہے جبکہ متعلقہ محکمے لمبی تان کر سوگئے ہیں، انتظامیہ نے شہریوں کو درپیش مسائل کے حل سے مکمل لاتعلقی اختیار کرلی، ضلعی انتظامیہ کی جانب سے لوکل گورنمنٹ سمیت مختلف محکموں کو الرٹ رہنے اور بارشوں سے پیدا ہونے والی صورتحال سے نمٹنے کی ہدایات بھی سوشل میڈیا پوسٹ تک محدود ہوکر رہ گئی.
شہریوں کا کہنا ہے کہ گاڑیاں موٹرسائیکلیں پانی میں پھنس کر خراب ہورہی ہیں،لوگ شدید پریشانی سے دوچار ہیں، مگر مقامی انتظامیہ خاموش تماشائی بنی ہوئی ہے.
