ایڈیشنل ڈپٹی کمشنر جنرل محمد شفیق نے کہا ہے کہ خصوصی افراد معاشرے کا اہم فرد ہیں جنہیں کسی طور پر نظر انداز نہیں کیا جا سکتا، یہ افراد خصوصی توجہ کے مستحق ہوتے ہیں۔ ذرا سی توجہ سے یہ افراد ملک کے اہم شہری ثابت ہوسکتے ہیں۔ پنجاب حکومت معذور افراد کی بحالی ،تربیت اور بنیادی سہولیات کی فراہمی کے ساتھ ساتھ ان کی مالی امداد کیلئے تمام وسائل بروئے کار لا رہی ہے۔
منڈی بہاﺅالدین ( ایم.بی.ڈین نیوز 27 اکتوبر 2021) ان خیالات کا اظہار انہوں نے ڈی سی آفس میں معذور افراد میں مالی امداد کے چیکس تقسیم کرنے کی تقریب سے خطاب کرتے ہوئے کیا۔ تقریب میں ڈپٹی ڈائریکٹر سوشل ویلفیئر اینڈ بیت المال عاطف علی وڑائچ ، چیئرمین بیت المال ہارون اصغر، صدر ٹاﺅن ڈویلپر عنایت الرحمٰن گوندل، سماجی کارکن مرزا راشد محمود کے علاوہ خصوصی افراد کے نمائندوں کے علاوہ معذورافراد بھی موجود تھے۔
اجلاس کو بریفنگ دیتے ہوئے ڈپٹی ڈائریکٹر سوشل ویلفیئر عاطف علی وڑائچ نے بتایا کہ حکومت کی جانب سے 30 مستحق معذور افراد کی مالی امداد کے لیے فی کس 10 ہزار روپے کے حساب سے 3 لاکھ کے امدادی چیکس تقسیم کئے جا رہے ہیں ۔ انہوں نے کہا کہ حکومت کی جانب سے معذور افراد کیلئے دیگر سہولیات جن میں خدمت کارڈ، سہولت ڈیسک ، ملازمتوں میں مخصوص کوٹہ اور سفری رعائت دی جا رہی ہیں۔ انہوں نے مذید کہا کہ صوبائی حکومت خصوصی افراد کو دوسروں کی محتاجی سے نکال کر نارمل افراد کے ساتھ شانہ بشانہ روزگار کمانے کے قابل بنا رہی ہے۔ انہوں نے مزید کہا کہ معذور افراد کو معاشرے کا مفید اور کار آمد شہری بنانے کیلئے ان کو صلاحیتوں کے اعتبار سے فنی تربیت فراہم کی جا رہی ہے۔
اس موقع پر ایڈیشنل ڈپٹی کمشنر جنرل محمد شفیق نے شرکاء سے کہا کہ خصوصی افراد کا معاشرے کے دیگر افراد کے ساتھ ایسا ماحول اور تعلق پیدا کیا جائے کہ انہیں بھی نارمل انسانوں کی طرح معاشرے میں زندگی گزار نے پر کوئی دقت پیش نہ آئے۔ محمد شفیق نے کہاکہ حکومت اور ضلعی انتظامیہ کا پختہ عزم ہے کہ معاشرے کے کمزور طبقات اور معذوری کے شکار افراد کی بہتری اور بحالی کیلئے تمام ممکنہ اقدامات اٹھائے جائیں گے۔
