ڈپٹی کمشنر محمد شاہد نے کہا ہے کہ وزیراعلیٰ پنجاب سردار عثمان بزدار کے ویژن اور چیف سیکرٹری کی واضح ہدایات کے مطابق افسران اپنی کارکردگی کو مزید بہتر بنا کر عوامی خدمت کو اپنا شعار بنائیں، سرکاری افسران کے پاس کارکردگی دکھانے کے علاوہ کوئی چوائس نہیں، کارکردگی نہ دکھانے والے افسران کی خدمات سرنڈر کر دی جائیں گی۔
منڈی بہاﺅلدین ( ایم.بی.ڈین نیوز 24 دسمبر 2021) ان خیالات کا اظہار انہوں نے آج یہاں ڈی سی آفس میں مختلف سرکاری محکموں کے ضلعی افسران کے ساتھ اجلاس کی صدارت کرتے ہوئے کیا۔ اجلاس میں ایڈیشنل ڈپٹی کمشنر ریونیو ڈاکٹر احسان الحق ضیاء، ایڈیشنل ڈپٹی کمشنر جنرل محمد شفیق، ایڈیشنل ڈپٹی کمشنر فنانس حافظ غلام مرتضیٰ، سی اوز ہیلتھ، ایجوکیشن ، اسسٹنٹ کمشنرز، زراعت، لوکل گورنمنٹ، اٹارنی، سوشل ویلفیئر کالجز، ایکسیئن ایریگیشن، ڈرینج، بلڈنگ، روڈز، وائلڈ لائف، پاپولیشن،فاریسٹ،انڈسٹریز،مارکیٹ کمیٹی کے علاوہ دیگر متعلقہ محکموں کے افسران بھی موجودتھے۔
قبل ازیں ڈپٹی کمشنر محمد شاہد کو ضلعی افسران نے اپنے اپنے محکموں کے متعلق تفصیلی بریفنگ دی۔ جس پر ڈپٹی کمشنر نے کہاکہ محکموں کے متعلق بریفنگ کا بنیادی مقصد ضلع میں صحت، تعلیم، پرائس کنٹرول ، کلین اینڈ گرین مہم، روڈ انفراسٹرکچر ، سرکاری محکموں کی کارکردگی اور دیگر مفاد عامہ کے امور کے حوالے سے جائزہ لینا ہے ۔
انہوں نے ا فسران کو ہدایت کی کہ وہ دفاتر میں اپنی موجودگی، دفتری اوقات کی پابندی، صفائی ستھرائی کے نظام ، فیلڈ ورکس اور اوپن ڈور پالیسی پر خصوصی توجہ دیں ۔ اس سلسلے میں زیرو ٹالرنس ہے اور اعلیٰ حکام کی جانب سے مانیٹرنگ کا عمل بھی جاری ہے ۔انہوں نے افسران پر واضح کیا کہ ضلع کی انتظامی امورز اور بنیادی ضروریات کو ہر صورت پورا کیا جائے گا۔
