منڈی بہاﺅالدین( ایم.بی.ڈین نیوز 03 فروری2021)ضلع منڈی بہاﺅالدین کے محلہ گوڑھا کے نامور ہاکی پلیئر خبیب احمد کو بہترین کارکردگی پر پہلی قائداعظم انٹر ڈویژن انڈر 23 ہاکی چیمپئن شپ ٹرافی کھیلنے کیلئے گوجرانوالہ ڈویژن ٹیم میں شامل کر لیا گیا ہے،خبیب احمد جو کہ پنجاب جونیئر ہاکی ٹیم کے کپتان ہیں انہیں ڈویژنل سطح پر نمائندگی حاصل کرنے پر شہر کی سیاسی اور سماجی شخصیات نے مبارکباد دی ہے۔
مبارکباد دینے والوں میں سابق ایم پی اے وسیم افضل چن، مشاہد رضا، اسسٹنٹ ٹو ڈی آئی او عاطف منیر،ڈاکٹر ارشاد احمد، ایڈووکیٹ حامد ممتاز رانجھا،رانا عمران بیگ سپورٹس، منشاءگوندل، میاں حسین احمد، میاں کلیم اللہ اور میاں سمیع اللہ شامل ہیں۔اس موقع پر ہاکی پلیئر خبیب احمد نے کہا کہ میری کامیابیاں میرے والدین، اساتذہ اور کوچز کی بدولت ہےں اور میں اپنی کامیابیوں کو انہی شخصیات کے نام کرتا ہوں کہ جن کی بدولت سے آج مجھے اتنی بڑی کامیابی ملی ہے ،یہ میرے لئے اور اس ضلع کیلئے بہت بڑا اعزاز ہے۔
انہوں نے کہا کہ بہت کم مدت میں اور ہر قسم کے حالات میں اپنی پرفارمنس اور بہتر صلاحیتوں کی بدولت مطلوبہ ٹارگٹس کو حاصل کر کے ٹیم میں سلیکٹ ہوا ۔انہوں نے اس امید کا اظہار کیا کہ وہ ٹیم میں اپنی شاندار پرفارمنس سے منڈی بہاﺅالدین کا نام پوری دنیا میں روشن کریں گے۔ہاکی پلیئر خبیب احمد نے نوجوان نسل کو پیغام دیتے ہوئے کہا کہ بے راہ روی اور نشہ جیسی لعنت سے بچنے کیلئے کھیلوں کا فروغ ضروری ہے۔ کھیل کود سے جسمانی فٹنس کے ساتھ ساتھ ذہنی نشوونما کو فروغ اور استحکام حاصل ہوتا ہے۔ انہوں نے کہا کہ نوجوان نسل پاکستان کامستقبل ہے اور اپنے مستقبل کو درخشندہ بنانے کیلئے زیادہ سے زیادہ کھیلوں کے میدان آباد کرنا ہوں گے۔
