منڈی بہاﺅلدین( ایم.بی.ڈین نیوز 06 دسمبر 2021 )ڈپٹی کمشنر ڈاکٹر احسان الحق ضیاءنے کہا ہے کہ فضائی آلودگی کا باعث بننے والے بھٹہ خشت زگ زیگ ٹیکنالوجی استعمال کرکے دھوئیں پر قابو پانے میں حکومت اور انتظامیہ کی معاونت کریں کیونکہ سموگ فری ماحول میں ہی ہم سب کی بھلائی ہے۔
ان خیالات کا اظہار انہوں نے ضلع منڈی بہاﺅالدین کے مقامی بھٹوں کا اچانک دورہ کے موقع پر کیا۔ اس موقع پر فیلڈ آفیسر ماحولیات عاطف عمران، افتخار وڑائچ، فیاض وڑائچ، حسنین گوندل اور دیگر بھی موجود تھے۔ ڈپٹی کمشنر نے زگ زیگ ٹیکنالوجی پر مبنی بھٹوں کے معائنے کے دوران وہاں پر بننے والی اینٹوں کی کوالٹی، سانچے، کوئلے کے علاوہ تیار ہونے والی اینٹوں کی لاگت کا بھی جائزہ لیا۔ انہوں نے اینٹوں کی تیاری کے مراحل کا بھی بغور جائزہ لیا۔
ڈپٹی کمشنر نے وہاں پر کام کرنے والوں کے حالات کار کے حوالے سے انتظامی افسران اور بھٹہ خشت مالکان کو ضروری ہدایات بھی جاری کیں۔ڈپٹی کمشنر نے بھٹہ خشت مالکان سے اینٹوں کی تیاری کی لاگت کے حوالے سے استفسار کیا جس پر انہوں نے بتایا کہ بلور اور انڈیوسڈ دونوں طریقہ کار کے تحت اینٹوں کی تیاری کے حوالے سے بتایا ۔ جس پر انہوں نے بھٹہ خشت مالکان سے کہا کہ اگر انہیں کسی قسم کے مسائل درپیش ہوں تو فوری طور پر محکمہ ماحولیات یا ان سے رابطہ کر کے حل کروائے جا سکتے ہیں۔
ڈپٹی کمشنر نے محکمہ ماحولیات کو اضح ہدایات جاری کرتے ہوئے کہا کہ انسداد سموگ مہم کے تحت روزانہ کی بنیاد پر بھٹوں کا معائنہ کیا جائے اور بھٹہ خشت مالکان کے مسائل کے حل کیلئے حائل رکاوٹوں کو دور کیا جائے ۔ڈپٹی کمشنر نے باور کرایا کہ حکومت پنجاب نے پرانے بھٹوں پر ہمیشہ کیلئے پابندی عائد کر دی ہے بغیر زگ زیگ ٹیکنالوجی والوے بھٹوں کو سیل کر دیا جائے گا ۔
انہوں نے کہا کہ سموگ ، پھیپھڑوں ، سانس اور کینسر جیسی دیگر بیماریوں کا باعث ہے اور جانداروں کی بقاء کیلئے انتہائی خطرناک ہے ۔احسان الحق ضیاء نے متعلقہ افسران کو واضح کیا کہ جو بھٹہ جات زگ زیگ ٹیکنالوجی پر منتقل نہیں ہوئے ان بھٹہ جات کو سیل کر دیا جائے۔
