وزیراعلیٰ پنجاب سردار عثمان بزدار کی ہدایت پر ضلعی منڈی بہاﺅالدین میں عشرہ رحمت اللعالمین کے سلسلے میں تقریبات زورو شور سے جاری ہیں۔ دریں اثناءمحکمہ سوشل ویلفیئر اینڈ بیت المال کے زیر اہتمام محفل میلاد ( خواتین )کا انعقاد کیا گیا۔
منڈی بہاﺅالدین( ایم.بی.ڈین نیوز 14 اکتوبر 2021) تقریب کا باقاعدہ آغاز تلاوت کلام پاک سے کیا گیا اور حضور اکرم ﷺ کی بارگاہ اقدس میں گلہائے عقیدت و درودو سلام پیش کئے گئے۔ محفل میلاد میں بھاری تعداد میں خواتین نے شرکت کی ۔ اس موقع پر خواتین مقررین نے آپ ﷺ کی ذات اقدس کا حوالہ دیتے ہوئے کہا کہ اسوہ حسنہ ﷺ مسلمانوں کیلئے مشعل راہ ہے ، دنیاوی مشکلات کا حل آپ ﷺ کی تعلیمات پر عمل کرنے میں مضمر ہے ، انہوں نے مذید کہا کہ وزیراعلیٰ پنجاب سردار عثمان بزدار حکومت کی جانب سے عشرہ رحمت اللعالمین کا آغاز ایک احسن اقدام ہے ۔ جس کا بنیادی مقصد نوجوانوں کو آپ ﷺ کی تعلیمات، سیرت طیبہ سے حقیقی روشناس کرانا ہے تا کہ وہ اپنی زندگیاں اسلام کے زریں اصولوں کے مطابق گزار کر ملک کو ایک حقیقی اور فلاحی اسلامی ریاست بنانے میں قلیدی کردار ادا کرسکیں۔
https://mbdinnews.com/archives/64584
مقررین نے کہاکہ ہم اس با برکت ماہ کو عقیدت و احترام سے منا رہے ہیں اور آپ ﷺ کے بتائے ہوئے راستے پر چلنا ہمارے ایمان کا حصہ ہے ، آپ کی بعثت کی وجہ سے معاشرے کو جہالت اور گمراہی سے نجات ملی۔ مقررین نے واضح کیا کہ مسلمانوں کیلئے نبی اکرم خاتم النبین اور رحمت اللعالمین سے بڑھ کر دنیا میں اور کوئی نہیں اور ہر مسلمان حرمت رسول ﷺ پر اپنی جان و مال قربان کرنے کیلئے ہر لمحہ تیار ہے ۔انہوں نے مسلمانوں پر زور دیا کہ دشمنان اسلام کے مقابلے میں خود کو مضبوط بنانے کیلئے ہمیں آ پ ﷺ کی تعلیمات پر صدق دل سے عمل کرنا ہو گا تا کہ دنیا اور آخرت میں سرخرو ہو سکیں۔
