ایڈیشنل سیکریٹری وزیر اعلی پنجاب علی عباس اور ڈپٹی کمشنر طارق علی بسرا نے کہا ہے کہ تمام ترقیاتی سکیموں کو مقررہ ٹائم لائنن کے اندر پایہ تکمیل تک پہنچایا جائے اور ان کے تعمیراتی معیار کو یقینی بنایا جائے تاکہ یہ منصوبہ دیرپا ثابت ہوں اور عوام الناس ان سے زیادہ سے زیادہ مستفید ہوں۔ انہوں نے کہا کہ ترقیاتی سکیموں کیلئے مختص فنڈز قوم کی امانت ہیں جن کی ایک ایک پائی دیانتداری سے خرچ کی جانی چاہیے ۔
منڈی بہاءالدین ( ایم.بی.ڈین نیوز 27ستمبر 2021) ان خیالات کا اظہار انہوں نے جیہ کھوکھراں میں زیر تکمیل تر قیاتی سکیموں کے حوالے سے بریفنگ لینے اور جاری کام کا معائنہ کرنے کے بعد کیا۔ اس موقع پر ایڈیشنل ڈپٹی کمشنر فنانس حافظ غلام مرتضٰی اور دیگر متعلقہ افسران بھی موجود تھے۔ دورے کے دوران ایڈیشنل ڈپٹی کمشنر فنانس حافظ غلام مرتضیٰ نے ایڈیشنل سیکریٹری وزیر اعلی اور ڈپٹی کمشنر کو جیہ کھوکھراں میں جاری ترقیاتی سکیموں کے حوالے سے تفصیلی بریفنگ دی۔ بعد ازاں انہوں نے وہاں پر زیر تکمیل ترقیاتی سکیموں کا معائنہ بھی کیا۔
انہوں نے ان ترقیاتی منصوبوں پر فزیکل اور فنانشل پراگرایس رپورٹس کا بھی معائنہ کیا اور بعض تکنیکی رکاوٹوں کو دور کرنے اور مسائل کے حل پر ضروری ہدایات بھی جاری کیں۔ انہوں نے ہدایت کی کہ جاری ترقیاتی سکیموں کے دوران تکمیل تک ان کے معائنے کو یقینی بنایا جائے۔ انہوں نے کہا کہ شہری سہولیات کی فراہمی کو یقینی بنانے کے لیے منظم منصوبہ بندی کے تحت ٹیم ورک کے تحت مطلوبہ نتائج کا حصول ممکن بنایا جائے۔انہوں نے کہاکہ وزیراعلیٰ پنجاب عثمان بزدار کی حکومت ترقیاتی اسکیموں کی تکمیل کیلئے ہر ممکن وسائل مہیا کررہی ہے ۔
وزیراعلیٰ پنجاب سردار عثمان بزدار کے صوبے بھر میں ترقیاتی کاموں کی وجہ سے صوبے بھر میں واضح تبدیلی نظر آرہی ہے۔انہوں نے کہا کہ صوبائی حکومت سڑکوں اور دیگر فلاحی منصوبہ جات کی تعمیرو توسیع کیلئے ہر ممکن وسائل اور فنڈز مہیا کر رہی ہے لہذٰا تمام منصوبے وقت پر مکمل کئے جائیں ۔ غیر ضروری تاخیر ہر گز برداشت نہیں کی جائے گی۔انہوں نے مذید کہا کہ متعلقہ افسران اور انجینئرز ترقیاتی فنڈز کا بر وقت استعمال یقینی بنائیں اور ترقیاتی کاموں کی کوالٹی پر خصوصی توجہ دی جائے ، متعلقہ محکمے ذمہ داری کا مظاہرہ کریں کیونکہ جتنی جلدی ترقیاتی کام مکمل ہوں گے عوام الناس اتنی جلدی ہی ان سے مستفید ہوں گے۔
