امریکی ٹیکنالوجی جائنٹ ایپل کی مصنوعات کودنیا بھرمیں مہنگا سمجھا جاتا ہے، لیکن ایپل جیسی کمپنی نے بھی مہنگائی کے ہاتھوں مجبورہوکرآئی فون 13کی قیمت میں بڑا اضافہ کردیا ہے۔
ٹیکنالوجی ویب سائٹ گیجٹس 360 کے مطابق ٹیکنالوجی جائنٹ نے ڈالر کے مقابلے جاپانی ین کی گرتی ہوئی قدر اور بڑھتی ہوئے مہنگائی کی وجہ سے آئی فون 13 سیریز کی قیمتیں بڑھا دیں ہیں۔
ایپل کی ویب سائٹ پرظاہرہونے والی قیمتوں کے مطابق آئی فون 13 کے بنیادی ماڈل کی نئی قیمت 1 لاکھ 17 ہزار 800 جاپانی ین ( ایک لاکھ 78 ہزارپاکستانی ) ہوگئی ہے، جب کہ اس سے قبل یہ 99 ہزار 8 سوجاپانی ین ( ایک لاکھ 51 ہزارپاکستانی) پر تھی۔
یہ بھی پڑھیں: آئی فون 14 ستمبر میں متعارف کرائے جانے کا امکان
رپورٹ کے مطابق رواں سال اب تک ین کی قدر میں 18 فیصد کی کمی واقع ہوچکی ہے، جس کی وجہ سے جاپان کی اسمارٹ فون مارکیٹ پر راج کرنے والے آئی فون کی قیمت بھی بڑھ گئی ہے۔ حالیہ مہنگائی کی وجہ سے جاپان میں گزشتہ کئی سالوں سے مستحکم قیمتوں پر فروخت ہونے والی دیگر اشیائے ضروریہ کی قیمتوں میں اضافےسے بھی صارفین کی قوت خرید متاثرہوئی ہے۔
اسمارٹ فون اورموبائل ایپلی کیشنز پر کام کرنے والی ریسرچ فرم سینٹرپوائنٹ کی جانب سے گزشتہ ماہ جاری ہونے والی ایک رپورٹ میں بتایا گیا تھا کہ اپریل کے مہینے میںایپل آئی فون دنیا کے سب سے زیادہ فروخت ہونے والے اسمارٹ فونزمیں سرفہرست تھا۔ اس فہرست میں آئی فون 13، آئی فون 13 پرو میکس، آئی فون 13 پرو اور آئی فون 12 شروع کے چارنمبروں پر موجود تھے۔
رپورٹ میں یہ بھی بتایا گیا ہے کہ دنیا بھر میں فروخت ہونے والے اسمارٹ فون کی مارکیٹ میں ایپل کا شیئرساڑھے 5 فیصد ہے۔ ایپل کاسب سے مہنگاماڈل آئی فون 13 پرو میکس 3 اعشاریہ 4 فیصد کے ساتھ دوسرے، آئی فون 13 پرو اور آئی فون 12 بالترتیب 1 اعشاریہ 8 اور 1 اعشاریہ 6 فیصد مارکیٹ شیئرز کے ساتھ تیسرے اور چوتھے نمبر پر رہا۔
جب کہ ایپل کی جانب سے متعارف کرایا گیا اب تک کا سب سے سستا ترین آئی فون ایس ای 2022 ایک اعشاریہ 4 فیصد مارکیٹ شیئر کے ساتھ اسمارٹ فون کی عالمگیر فروخت میں ساتویں نمبرپررہا۔ جب کہ جاپانی اسمارٹ فون کی مارکیٹ میں اس کا حصہ 18 فیصد رہا۔
واضح رہے کہ رواں سال کے آخر تک ایپل کی جانب سے آئی فون 14 سیریز کے تحت چارماڈلز کی لانچنگ متوقع ہے، جس میں سے دو پرو ماڈلز کو D73 اور D74، جب کہ دو نان پرو ماڈلز کو D27اورD28 کا کوڈ نام دیا گیا ہے۔
