لاہور: پنجاب کی اوپن مارکیٹ میں نجی گندم کی قیمتیں 4،100 روپے فی من تک پہنچنے سے نیا ملکی ریکارڈ بن گیا۔ محکمہ خوراک پنجاب نے سرکاری آٹا کی سپلائی کو طلب کے مطابق متوازن کرنے اور گندم کی قیمتوں کو مزید بڑھنے سے روکنے کیلیے گزشتہ روز فلورملز کے یومیہ گندم کوٹہ میں2،400 ٹن اضافہ کردیا ہے۔
آج سے فلورملز کو یومیہ18،600 ٹن کی بجائے21 ہزار ٹن گندم فراہم کی جائے گی جس سے یومیہ سرکاری آٹا سپلائی میں96 ہزار تھیلوں کا اضافہ ہوگا۔ مزید برآں پنجاب حکومت کو وفاق کی جانب سے فراہم کردہ امپورٹڈ گندم محکمہ خوراک کے گوداموں میں پہنچنا شروع ہو گئی۔
کراچی بندرگاہ پہنچنے والے پہلے جہاز کی 64ہزار ٹن میں سے 32 ہزار ٹن پنجاب میں پہنچ چکی ہے جبکہ64 ہزار ٹن گندم لیکر روس سے آنے والا دوسرا جہاز بھی بندرگاہ پر لنگر اندازہو چکا ہے۔
گزشتہ روز لاہور میں نجی گندم کی قیمت4 ہزار روپے فی من جبکہ راولپنڈی اسلام آباد میں4،100 روپے فی من تک تھی ۔یہ ملکی تاریخ میں نجی گندم کی قیمت کا نیا ریکارڈ ہے ،اس بڑے اضافہ کی وجہ سے اوپن مارکیٹ میں نجی گندم کے دستیاب ذخائر میں نمایاں کمی آئی ہے۔
اس صورتحال سے نپٹنے کیلیے گزشتہ روز سیکرٹری فوڈ نادر چٹھہ اور ڈائریکٹر فوڈ شوذب سعید نے فلورملز کا یومیہ سرکاری کوٹہ21ہزار ٹن کردیا ہے جس سے نجی گندم کی بڑھتی قیمتوں میں ٹھہراؤ آنے کی توقع کی جا رہی ہے جبکہ اس اضافی کوٹہ سے مارکیٹ میں20 کلو والے مزید 96 ہزار آٹا تھیلوں کی سپلائی کا اضافہ ہوگا۔
