Tag: Sarai Alamgir

ڈپٹی کمشنر شاہد عمران مارتھ نے کہا ہے کہ حکومت پنجاب کی اولین ترجیح عوام الناس کی فلاح وبہبود کیلئے کام کرنا ہے، مفاد عامہ کے منصوبوں کی تکمیل کی راہ میں کسی بھی قسم کی مشکلات حائل نہیں ہونے دیں گے، تمام متعلقہ محکمے ذمہ داری کا مظاہرہ کریں کیونکہ جتنی جلدی ترقیاتی منصوبہ جات مکمل ہوں گے عوام اتنا ہی جلد مستفید ہو گی۔

منڈی بہاﺅالدین( ایم.بی.ڈین نیوز 13فروری 2023) ان خیالات کا اظہار انہوں نے ڈی سی آفس میں ترقیاتی سکیموں میں پیشرفت کے حوالے سے منعقدہ اجلاس کی صدارت کرتے ہوئے کیا۔ اجلاس میں ایڈیشنل ڈپٹی کمشنر فنانس حافظ غلام مرتضیٰ، اسسٹنٹ کمشنر منڈی بہاوالدین طارق محمود ، محکمہ ہائی وے اور پبلک ہیلتھ کے افسران سمیت متعلقہ محکموں کے ضلعی افسران بھی موجود تھے۔

اجلاس میں مختلف منصوبوں پر تفصیلی جائزہ لیا گیا۔ایڈیشنل ڈپٹی کمشنر فنانس حافظ غلام مرتضیٰ اور متعلقہ محکموں کے افسران نے اجلاس کو بریفنگ دیتے ہوئے ضلع میں جاری میگا پراجیکٹس اور ترقیاتی سکیموں کے حوالے سے تفصیلی بریفنگ دی۔ مختلف منصوبوں پر بریفنگ لینے کے بعد ڈپٹی کمشنر شاہد عمران مارتھ نے کہاکہ پنجاب حکومت نے میگا پراجیکٹس کی جلد تکمیل کیلئے فنڈز جاری کر رکھے ہیں ۔ ترقیاتی منصوبوں کے افسران منصوبہ جات پر کام کی رفتار تیز کریں اور تمام سکیمیں کوالٹی کو مد نظر رکھتے ہوئے جلد از جلد مکمل کی جائیں۔

بعد ازاں ڈپٹی کمشنر نے جاری ترقیاتی سکیموں کو چیک کرنے کے حوالے سے منڈی بہاﺅالدین شہر تا سرائے عالمگیر روڈ، شہانہ لوک تا چیلیانوالہ روڈ اور رسول یونیورسٹی آف ٹیکنالوجی پر جاری کام کا معائنہ کیا۔ ڈپٹی کمشنر نے ان ترقیاتی منصوبوں پر فزیکل اور فنانشل پراگرایس رپورٹس کا بھی معائنہ کیا اور بعض تکنیکی رکاوٹوں کو دور کرنے اور مسائل کے حل پر ضروری ہدایات بھی جاری کیں۔

دورے کے دوران ڈپٹی کمشنر کو جاری ترقیاتی سکیموں کے حوالے سے بریفنگ دیتے ہوئے بتایا گیا کہ رسول یونیورسٹی، منڈی شہر تا سرائے عالمگیر روڈ، شہانہ لوک تا چیلیانوالہ روڈ پر کام جاری ہے ۔جس پر ڈپٹی کمشنر نے ایکسیئن بلڈنگ ،ہائی وے اور پبلک ہیلتھ افسران کو کام کی رفتار کو تیز کرنے کی ہدایت کی ۔انہوں نے منڈی شہر تا سرائے عالمگیر روڈ (6 کلو میٹر) ایک ماہ میں مکمل کرنے کا حکم دیا۔ ڈپٹی کمشنر نے شہانہ لوک تا سرائے عالمگیر روڈ کے ساتھ ساتھ نالہ کو پختہ کرنے کی بھی ہدایت کی ۔

انہوں نے کہاکہ نالہ بننے سے لوگوں کی مشکلات کم ہوں گی۔ انہوں نے کہا کہ ترقیاتی سکیموں کیلئے مختص فنڈز قوم کی امانت ہیں، جن کی ایک ایک پائی دیانتداری سے خرچ کی جانی چاہیے۔ ترقیاتی سکیموں کی رفتار اور کوالٹی پر کوئی سمجھوتہ نہ کیا جائے گا ۔ڈپٹی کمشنر نے کہاکہ حکومت سڑکوں اور دیگرز فلاحی منصوبہ جات کی تعمیرو توسیع کیلئے ہر ممکن وسائل اور فنڈز مہیا کر رہی ہے لہذٰا تمام منصوبہ جات کی تکمیل وقت پر مکمل کی جائے ۔ غیر ضروری تاخیر ہر گز برداشت نہیں کی جائے گی ۔