منڈی بہاءالدین میں سپورٹس کمپلیکس بنایا جائے گا، صوبائی وزیر کھیل

صوبائی وزیر کھیل پنجاب ملک فیصل ایوب کھوکھر کی زیر صدارت اجلاس ہوا جس میں اہم فیصلے کیے گئے۔ صوبائی وزیر کھیل ملک فیصل ایوب کھوکھر نے آئندہ سال کے لیے میگا سپورٹس پروجیکٹس کا اعلان کیا۔

اجلاس میں پنجاب کے تمام اضلاع میں والی بال، باسکٹ بال اور بیڈمنٹن کے لیے 100 آؤٹ ڈور گراؤنڈز بنانے کا منصوبہ پیش کیا گیا۔ وزیر کھیل نے لاہور میں ماڈل لوکیشن پر 50 آؤٹ ڈور سپورٹس سہولیات بنانے کا منصوبہ تیار کرنے کا حکم دیا۔

اجلاس کے دوران گفتگو کرتے ہوئے صوبائی وزیر کھیل ملک فیصل ایوب کھوکھر نے کہا کہ پنجاب میں 11 ارب روپے کی لاگت سے 68 نئے سپورٹس کمپلیکس تعمیر کیے جائیں گے۔ اگلے سال پنجاب میں 25 ارب روپے کی سپورٹس سکیموں پر کام ہو گا۔

انہوں نے کہا کہ پنجاب سٹیڈیم کو 800 ملین روپے کی لاگت سے اپ گریڈ کیا جائے گا۔ پنجاب سٹیڈیم میں شائقین کے بیٹھنے کی گنجائش 12 ہزار تک بڑھا دی جائے گی۔ نشتر پارک سپورٹس کمپلیکس میں اوپن والی بال کورٹ جبکہ لاہور میں آرچری کمپلیکس، کلائمبنگ وال اور بیس بال گراؤنڈ بنایا جائے گا۔

ملک فیصل ایوب کھوکھر نے کہا کہ پنجاب کے کئی شہروں میں اکھاڑے بنائے جائیں گے اور گوجرانوالہ میں ریسلنگ سٹیڈیم اسی سال مکمل کر لیا جائے گا۔ عالمی معیار کا سکواش کمپلیکس بھی اسی سال مکمل ہو جائے گا۔ ڈیرہ غازی خان، رحیم یار خان، عیسیٰ خیل، میانوالی اور پیر محل میں بھی سپورٹس کمپلیکس بنائے جائیں گے۔

صوبائی وزیر کھیل نے مزید کہا کہ ٹوبہ ٹیک سنگھ، احمد پور شرقیہ، منڈی بہاءالدین اور علی پور چٹھہ میں بھی سپورٹس کمپلیکس بنائے جائیں گے۔ سرگودھا، بہاولپور، پسرور، سیالکوٹ، وہاڑی، لودھراں اور دیگر شہروں میں بھی سپورٹس کمپلیکس بنائے جائیں گے۔ ساہیوال میں مصنوعی ہاکی ٹرف نصب کیا جائے گا۔