وزیراعلیٰ پنجاب، چیف سیکرٹری پنجاب اور کمشنر گوجرانوالہ کی ہدایت پر ڈپٹی کمشنر شاہد عمران مارتھ کی زیر صدارت ضلع بھر میں ٹریفک کے مسائل کے حل کے حوالے سے ایکسیڈینٹل ریویو کمیٹی کا اجلاس منعقد ہوا۔
منڈی بہاوالدین( ایم.بی.ڈین نیوز 07ستمبر 2023 )اجلاس میں اسسٹنٹ کمشنر منڈی بہاوالدین سہیل ریاض چھینہ، سیکرٹری آر ٹی اے فریال نعیم، ڈی ایس پی ٹریفک محمد طارق شفیع، ڈسٹرکٹ ایمرجنسی آفیسر عمران خان سمیت دیگر متعلقہ محکموں کے افسران نے شرکت کی۔
ڈسٹرکٹ ایمرجنسی آفیسر ریسکیو 1122 عمران خان نے اجلاس کو بریفنگ دیتے ہوئے ضلع میں پچھلے 6 ماہ کے دوران ہونے والے حادثات کی رپورٹ پیش کی ۔ ان حادثات کے ہونے کی وجوہات پر تفصیلی گفتگو کی گئی۔حادثات ہونے کی نمایاں وجوہات ٹریفک قوانین کی لاعلمی اور ان پر عمل پیرا نہ ہونا ، بغیر ہیلمٹ موٹر سائیکل چلانا، تیز رفتاری وغیرہ ہیں۔
ڈپٹی کمشنر شاہد عمران مارتھ نے بریفنگ سننے کے بعد کہا کہ والدین میں اس بات کی آگاہی پیدا کی جائے کہ وہ اپنے کم عمر بچوں کو موٹرسائیکل اور گاڑی کی ڈرائیونگ نہ کرنے دیں۔ انہوں نے ڈی ایس پی ٹریفک کو موٹر سائیکل چلاتے وقت ہیلمٹ نہ استعمال کرنے والوں کے خلاف سخت کاروائی کی ہدایت کی۔
انہوں نے ہدایت کی کہ بغیر فٹنس سرٹیفکیٹ گاڑیوں کو کسی صورت شاہراہوں پر نہ آنے دیا جائے اور خلاف ورزی کی صورت میں نہ صرف بھاری چالان کئے جائیں بلکہ ان گاڑیوں کو تھانوں میں بھی بند کر دیا جائے۔ان اقدامات سے ہم ممکنہ ٹریفک حادثات میں کافی حد تک کمی لا سکتے ہیں ۔ بعد ازاں ڈپٹی کمشنر نے ریجنل ٹرانسپورٹ اتھارٹی کے اجلاس کی صدارت کی اور سیکرٹری آر ٹی اے کو ضروری ہدایات جاری کیں۔
