اسلام آباد: معروف مبلغ اور اسکالر ڈاکٹر ذاکر نائیک پاکستان پہنچ گئے۔ نیو اسلام آباد ایئرپورٹ پہنچنے پر پرائم منسٹر یوتھ پروگرام کے چیئرمین رانا مشہود، ایڈیشنل سیکرٹری وزارت مذہبی امور سید ڈاکٹر عطا الرحمان اور پارلیمانی سیکرٹری مذہبی امور شمشیر علی مزاری اور دیگر نے ان کا استقبال کیا۔ ڈاکٹر ذاکر نائیک 28 اکتوبر تک ملک میں قیام کریں گے.
وزارت مذہبی امور کے ترجمان کے مطابق ڈاکٹر ذاکر نائیک اسلام آباد، کراچی اور لاہور میں عوامی اجتماعات سے خطاب کریں گے جب کہ وہ نماز جمعہ سے بھی خطاب اور امامت کریں گے۔ پاکستان میں قیام کے دوران وہ اعلیٰ سرکاری حکام سے ملاقاتیں بھی کریں گے جبکہ ڈاکٹر ذاکر نائیک عوامی تقریبات میں بھی شرکت کریں گے۔
رانا مشہود نے کہا کہ وہ ڈاکٹر ذاکر نائیک کی علمی خدمات کو خراج تحسین پیش کرتے ہیں جبکہ ڈاکٹر ذاکر نائیک کی اسلامی بصیرت اعتماد اور اعتماد کو فروغ دیتی ہے۔ ڈاکٹر ذاکر نائیک کو سخت سیکیورٹی میں اسلام آباد لایا گیا۔
