پاکستان ریلوے نے ایکسپریس اور مسافر ٹرینوں کے کرایوں میں 2 فیصد اضافہ کر دیا۔ پاکستان ریلوے نے کرایوں میں اضافے کا نوٹیفکیشن جاری کر دیا ہے۔
میڈیا کے مطابق پاکستان ریلوے کے نوٹیفکیشن کے تحت ٹرین کے کرایوں میں اضافے کا اطلاق 4 جولائی سے ہوگا۔ریلوے کے کرایوں میں اضافے کا اطلاق تمام مسافروں، شٹل اور سیلون گاڑیوں پر ہوگا۔
کرایہ میں 2 فیصد اضافہ ایڈوانس بکنگ پر بھی لاگو ہوگا۔ ڈیزل کی قیمتوں میں اضافے سے ریلوے کو ماہانہ 103 ملین روپے کا نقصان ہو رہا ہے۔ محکمہ ریلوے نے ایک ماہ میں دوسری بار ٹرین کے کرایوں میں اضافہ کیا ہے۔
18 جون کو مسافر ٹرینوں کے کرایوں میں 3 فیصد اضافہ کیا گیا۔ اسی طرح 18 جون کو مال بردار ٹرین کے کرایوں میں 4 فیصد اضافہ کیا گیا۔
علاوہ ازیں پٹرولیم مصنوعات کی قیمتوں میں اضافے کے بعد انٹر سٹی بس سروس کے کرایوں میں بھی اضافہ ہو گیا ہے۔ مختلف انٹر سٹی بس سروسز کے مسافروں نے کرایوں میں اضافے پر تشویش کا اظہار کیا ہے۔
ایک مسافر نے بتایا کہ وہ 2 ہزار روپے دے کر صادق آباد آیا تھا، اب 2،300 روپے وصول کر رہے ہیں۔ ایک اور مسافر نے بتایا کہ وہ ڈھائی سو روپے دے کر میرپور خاص سے آیا تھا، اب ٹرانسپورٹرز تین ہزار روپے کا مطالبہ کر رہے ہیں۔
دوسری جانب ٹرانسپورٹرز کا کہنا ہے کہ پیٹرولیم مصنوعات کی قیمتوں میں اضافے سے ہمارا کاروبار متاثر ہو رہا ہے۔ کرایہ بڑھانا ہماری مجبوری ہے، ہم نے تمام اخراجات پورے کرنے ہیں۔ دوسری جانب رکشہ اور آن لائن ٹیکسی سروس فراہم کرنے والوں نے بھی زائد کرایہ وصول کرنا شروع کر دیا ہے جس کی وجہ سے عوام رل گئے ہیں۔
