ڈپٹی کمشنر تسنیم علی خاں کی زیر صدارت ڈسٹرکٹ کوآرڈی نیشن کمیٹی برائے پاپولیشن کا اجلاس ڈی سی کمپلیکس کے کانفرنس روم میں منعقد ہوا۔ اجلاس میں ڈسٹرکٹ پاپولیشن ویلفیئر آفیسر محمد آصف نوید ،سی ای او ہیلتھ ڈاکٹر عابد یوسف، ڈی ایچ او ڈاکٹر افتخار، میڈیکل سپرنٹنڈنٹ ڈسٹرکٹ ہیڈ کوارٹر ہسپتال ڈاکٹر قمر الزمان گورائیہ ، ڈپٹی ڈسٹرکٹ پاپولیشن ویلفیئر آفیسرعتیق الرحمٰن اور دیگرمحکموں کے افسران نے شرکت کی۔
منڈی بہاﺅالدین ( ایم.بی.ڈین نیوز 0 نومبر 2022) ڈی او پاپولیشن محمد آصف نوید نے اجلاس کو بریفنگ دیتے ہوئے بتایا کہ رواں ماہ کے دوران محکمہ بہبود آبادی نے ضلع کی تینوں تحصیلوں میں دور دراز مقامات پرکیمپس لگائے، جہاں مانع حمل ادویات اور دیگر سہولیات فراہم کی گئیں۔ انہوں نے بتایا کہ محکمہ بہبود آبادی کی فیلڈ ورکنگ سرگرمیوں کی وجہ سے عوام الناس میں درمیانی مدت کے مانع حمل ادویات کے استعمال میں اضافہ ہورہا ہے۔
محکمہ کی سربراہی میں 51 فلاحی مراکز3 فیملی ہیلتھ کلینکس، 3فیملی ہیلتھ موبائل یونٹس، 69 فیملی ویلفیئر اسسٹنٹ، 13 سوشل موبلائزر عوام الناس کو خاندانی منصوبہ بندی کے لحاظ سے معیاری طبی سہولیات اور ماں ، بچے کی صحت اور خاندانی منصوبہ بندی کے حوالے سے سہولیات بھی مہیا کر رہے ہیں۔
انہوں نے اجلاس کو بتایا کہ سکولوں، کالجوں اور یونیورسٹیوں میں بلوغت، ذاتی صفائی اور متوازن غذا کے حوالے سے ضروری معلوماتی سیشنز اور سیمینارز منعقد کئے جا رہے ہیں اور جمعہ کے خطبات میں ماں اور بچے کی صحت کے حوالے سے بھی آگاہی فراہم کی جاتی ہے ۔ جس کے خاطر خواہ نتائج حاصل ہو رہے ہیں اور بہبود آبادی کے اصولوں کی حمایت میں روشنی کی نئی امید پیدا ہوئی ہے۔
بریفنگ سننے کے بعد ڈپٹی کمشنر تسنیم علی خاں نے کہا کہ حکومت پنجاب آبادی میں بے ہنگم اضافہ کی روک تھام کیلئے اصلاحی و انتظامی اقدامات کر رہی ہے، کیونکہ وسائل اور آبادی کے توازن کو برقرار رکھ کر ہی ملکی ترقی ممکن ہو سکتی ہے ۔انہوں نے کہا کہ محکمہ بہبود آبادی عملی طور پر کوالٹی آف ورک کو یقینی بنائے، اور اگلے اجلاس تک وسائل اور سٹاف کو مد نظر رکھتے ہوئے جامع پلان ترتیب دیں تا کہ بڑھتی ہوئی آبادی کی روک تھام کیلئے آگاہی مہم کو فعال اور موثر بنایا جا سکے ۔
انہوں نے کہاکہ شادی شدہ جوڑوں کو خاندانی منصوبہ بندی کے بارے خاص طور پر آگاہی دیں ،بلاشبہ محکمہ بہبود آبادی کا بنیادی کام ہی عوام الناس کو مختلف طریقوں سے آمادہ کر کے خاندانی منصوبہ بندی پر عملدرآمد کروانا ہے۔ انہوں نے کہا کہ محکمے کی سرگرمیوں کے حوالے سے جہاں جہاں خامیاں پائی جاتی ہیں ان کو درست کر کے مذید موثر اور فعال بنایا جائے۔
