پی ڈی ایم اے پنجاب نے بھی طوفان، آندھی اور موسلا دھار بارش کے خطرے کے پیش نظر الرٹ جاری کر دیا ہے۔
پی ڈی ایم اے نے پنجاب کے تمام اداروں اور ضلعی انتظامیہ کو ہائی الرٹ رہنے کی ہدایات جاری کر دی ہیں۔ جس کے بعد صوبائی کنٹرول روم سمیت پنجاب بھر کے ڈسٹرکٹ ایمرجنسی آپریشن سینٹرز کسی بھی ہنگامی صورتحال سے نمٹنے کے لیے پوری طرح تیار ہیں۔
پی ڈی ایم اے نے اپنے بیان میں کہا ہے کہ مشرقی اور وسطی بحیرہ عرب میں انتہائی شدید سمندری طوفان (BIPARJOY) موجود ہے۔ محکمہ موسمیات کے مطابق طوفان 14 جون کی صبح تک مزید شمال کی جانب بڑھے گا۔
سمندری طوفان کے باعث 14 جون سے مغربی ہوائیں ملک کے بالائی علاقوں میں داخل ہونے کا امکان ہے جس سے لاہور، اسلام آباد، مری، گلیات، راولپنڈی، اٹک، چکوال، سیالکوٹ، گوجرانوالہ، منڈی بہاؤالدین اور نارووال میں گرج چمک کے ساتھ بارش کا امکان ہے۔ آسمانی بجلی کے ساتھ بارش ہو سکتی ہے۔
پی ڈی ایم اے نے مزید کہا ہے کہ 15 سے 18 جون کے دوران لاہور، اسلام آباد، مری، گلیات، راولپنڈی، اٹک، چکوال، گوجرانوالہ، نارووال، سیالکوٹ، قصور، جہلم، سرگودھا، شیخوپورہ، فیصل آباد، جھنگ، ٹوبہ ٹیک سنگھ، ننکانہ، منڈی بہاؤالدین، خوشاب، میانوالی، بھکر، لیہ، ڈی جی خان، ملتان، کوٹ ادو، بہاولپور، بہاولنگر اور رحیم یار خان میں تیز ہواؤں، آندھی اور گرج چمک کے ساتھ بارش کا امکان ہے۔
پی ڈی ایم اے کے مطابق خراب موسم کے باعث مری کے پہاڑی علاقوں میں لینڈ سلائیڈنگ کا خطرہ ہے۔ پنجاب میں آندھی اور ژالہ باری سے کھڑی فصلوں اور کمزور ڈھانچوں کو شدید نقصان پہنچنے کا خطرہ ہے۔ کاشتکار موسم کی پیش گوئی کو مدنظر رکھتے ہوئے اپنے معاملات کو منظم کریں۔ تمام اضلاع بروقت انتظامات مکمل کریں اور ہنگامی حالات سے نمٹنے کے لیے تیار رہیں۔
