پنجاب کے مختلف شہروں میں آج بھی مطلع ابر آلود رہنے کا امکان ہے۔ لاہور سمیت ندی نالوں کے بالائی علاقوں میں موسلادھار بارش کی پیشگوئی کی گئی ہے۔
پی ڈی ایم اے کے ترجمان کے مطابق حالیہ بارشوں کے حوالے سے صوبائی کنٹرول روم اور ڈسٹرکٹ ایمرجنسی آپریشن سینٹرز کو الرٹ کر دیا گیا ہے۔
ترجمان کے مطابق لاہور، راولپنڈی، فیصل آباد، گوجرانوالہ، سرگودھا، ملتان، ساہیوال، بہاولپور، جہلم، اٹک، چکوال، مری، گلیات، میانوالی، نارووال، گجرات، سیالکوٹ، ٹوبہ ٹیک سنگھ، منڈی بہاؤالدین اور ڈی جی خان میں تیز ہواؤں اور گرج چمک کے ساتھ بارش کا امکان ہے۔
پی ڈی ایم اے کے مطابق شدید بارشوں سے نشیبی علاقوں اور ندی نالوں میں طغیانی کا خدشہ ہے جب کہ مری کے پہاڑی علاقوں میں لینڈ سلائیڈنگ کا بھی امکان ہے۔ شہریوں، سیاحوں اور مسافروں کو مشورہ دیا گیا ہے کہ وہ غیر ضروری سفر سے گریز کریں اور پیشین گوئی کی مدت کے دوران انتہائی احتیاط برتیں۔
پی ڈی ایم اے نے خبردار کیا ہے کہ تیز بارش اور آندھی سے خستہ حال اور مٹی سے بنے مکانات کو نقصان پہنچ سکتا ہے۔ اس لیے شہریوں کو چاہیے کہ وہ محفوظ مقامات پر رہنے اور احتیاطی تدابیر اختیار کرنے پر توجہ دیں۔
ڈی جی پی ڈی ایم اے عرفان علی کاٹھیا نے متعلقہ اضلاع کو سٹاف اور مشینری کو ہائی الرٹ رکھنے کی ہدایات جاری کی ہیں تاکہ کسی بھی ہنگامی صورتحال سے نمٹا جا سکے۔
