منڈی بہاؤالدین: (راجہ محمد ایوب) ڈسٹرکٹ جیل منڈی بہاؤالدین کے قیدیوں میں عید الفطر کی خوشیاں بانٹنے کے لئے ڈیوٹی ڈسٹرکٹ اینڈ سیشن جج منڈی بہاؤالدین محمد نعیم سلیم نے سینئر سول جج راجہ عقیل احمد جنجوعہ کے ہمراہ ڈسٹرکٹ جیل منڈی بہاؤالدین کا دورہ کیا ، جیل آمد پر سپرنٹنڈنٹ جیل محمد جہانگیر ڈوگر نے جیل افسران کے ہمراہ جج صاحبان کا شاندار استقبال کیا
اس موقع پر جیل کے چاک و چوبند دستے نے گارڈ آف آنرز پیش کیا اور سلامی دی، معزز ججز نے جیل کی مختلف بیرکوں چکیوں لنگر خانے ہسپتال اور ڈسپنسری کا وزٹ کیا اور ہسپتال میں داخل مریضوں کی عیادت کی جیل اسیران کو دیئے جانے والے کھانے کا معیار چیک کیا اور صفائی ستھرائی کا بھی جائزہ لیا ، جج صاحبان نے جیل کے قیدیوں سے فرداً فرداً ملاقات بھی کی اور ان کے مسائل سنے
نوعمر قیدیوں کے تمام مسائل کو موقع پر ہی حل کرنے کے احکامات جاری کئے جبکہ جیل میں صفائی ستھرائی اور قیدیوں کو فراہم کئے جانے والے کھانے کے اعلی معیار کو سراہا اور جیل کے شاندار انتظامات پر سپرنٹنڈنٹ جیل محمد جہانگیر ڈوگر کو شاباش دی اس موقع پر قیدیوں کو عید کی خوشیوں میں شامل کرنے کے لئے تحائف بھی تقسیم کئے گئے
معمولی جرائم میں ملوث 12 قیدیوں کو فوری طور پر رہا کرنے کا حکم دیا ، رہا ہونے والے قیدی اپنے گھر والوں کے ہمراہ عید کی خوشیاں منائیں گے –
