ڈپٹی کمشنر تسنیم علی خاں نے چلڈرن ہسپتال میں پانچ سال سے کم عمر کے بچوں کو پولیو ویکسین کے قطرے پلا کر پانچ روزہ انسدادِ پولیو مہم کا افتتاح کر دیا، اس موقع پر سی ای او ہیلتھ ڈاکٹر محمد عابد یوسف، ڈسٹرکٹ ہیلتھ آفیسرز ڈاکٹر محمد افتخار، ڈاکٹر شکیل نذر،میڈیکل سپرنٹنڈنٹ چلڈرن ہسپتال ڈاکٹر اعجاز مغل، صدر پی ایم اے ڈاکٹر طارق چدھڑ، فوکل پرسن برائے ای پی آئی/پولیورافعہ ناہید، پی اے ٹو سی او ہیلتھ ارسلان رﺅف اور دیگر افسران بھی موجود تھے۔
منڈی بہاﺅالدین ( ایم.بی.ڈین نیوز 14جنوری 2023) اس موقع پر ڈپٹی کمشنر تسنیم علی خاں کا کہنا تھا کہ پولیو سے پاک پاکستان ہم سب کا اصل ہدف ہے، ضلع کے پولیو فری سٹیٹس کو برقرار رکھنے کے لئے ہر شخص اپنی ذمہ داری پوری کرے۔انہوں نے محکمہ صحت کے افسران کو ہدایت کی کہ وہ انسداد پولیو مہم کے دوران ٹیموں کی کارکردگی کی خود مانیٹرنگ کریں اور قطرے پلانے والی ٹیموں کی روزانہ کی بنیاد پر سکریننگ کی جائے اور اس بات کو یقینی بنایا جائے کہ کوئی علاقہ ایسا نہ رہے جہاں پولیو ٹیم نہ پہنچی ہو اور نہ ہی کوئی بچہ پولیو ویکسین کے قطرے پلائے جانے سے محروم رہے۔
ڈپٹی کمشنر کا مزید کہنا تھا کہ ضلع منڈی بہاوالدین میں 16 سے 20 جنوری تک جاری رہنے والی اس مہم میں پانچ سال تک کی عمر کے 3 لاکھ 16 ہزار 261 بچوں کو پولیو ویکسین کے قطرے پلائے جائیں گے، جس کیلئے محکمہ صحت کے 2،922 ورکرز پر مشتمل 70 فکسڈ ٹیمیں، 43 ٹرانزٹ پوائنٹس ٹیمیں، گھر گھر جانے والی1،225 ٹیمیں، 02 رومنگ ٹیمیں، 70 یوسی ایم اوز جبکہ 262 ایریا انچارجز مقرر کئے گئے ہیں۔
ڈپٹی کمشنر تسنیم علی خاں کا کہنا تھا کہ والدین اپنے بچوں کو پولیو سے بچاﺅ کے قطرے پلانے کیلئے محکمہ صحت کی ٹیموں سے تعاون کریں تا کہ ہم اپنی آنے والی نسلوں کو اس خطرناک اور موذی مرض سے محفوظ رکھ سکیں۔ بعد ازاں ڈپٹی کمشنر کی سربراہی میں چلڈرن ہسپتال سے پرانا تھانہ روڈ تک آگاہی واک بھی منعقد کی گئی۔
