ڈپٹی کمشنرشاہد عمران مارتھ نے 26 فروری 2024 سے شروع ہونے والی پانچ روزہ انسداد پولیو مہم کا افتتاح کر دیا۔ڈپٹی کمشنر نے چلڈرن ہسپتال میں پانچ سال تک کے بچوں کو پولیو کے قطرے پلا کر مہم کا با قاعدہ افتتاح کیا۔
منڈی بہاوالدین ( ایم.بی.ڈین نیوز 24 فروری 2024 ) اس موقع پر ڈپٹی کمشنر کا کہنا تھا کہ پانچ روزہ انسداد پولیو مہم کے دوران محکمہ ہیلتھ کی ٹیمیں گھر گھر جا کرپانچ سال تک کے 3 لاکھ 24 ہزار 622 بچوں کو پولیو ویکسین اور وٹامن اے کے قطرے پلائیں گی۔ پولیو مہم کے لئے محکمہ صحت کے 2،922 ورکرز پر مشتمل 70 فکسڈ ٹیمیں، 45 ٹرانزٹ پوائنٹس ٹیمیں، گھر گھر جانے والی 1،225 ٹیمیں، 70 یوسی ایم اوز جبکہ 242 ایریا انچارجز مقرر کئے گئے ہیں۔
ڈپٹی کمشنر کا کہنا تھا کہ عملی اقدامات سے ہی پولیو کا خاتمہ ممکن ہے۔ انہوں نے ڈی ایچ اوز کو ہدایت کی کہ وہ انسداد پولیو مہم کے دوران ٹیموں کی کارکردگی کی خود مانیٹرنگ کریں اور قطرے پلانے والی ٹیموں کی روزانہ کی بنیاد پر سکریننگ کی جائے۔ ڈپٹی کمشنر نے تمام والدین سے اپیل کی ہے کہ وہ محکمہ ہیلتھ کی ٹیموں سے تعاون کریں اور اپنے پھول جیسے پانچ سال تک کی عمر کے بچوں کو عمر بھر کی معذوری سے بچانے کیلئے پولیو کے حفا ظتی قطرے ضرور پلائیں۔بعد ازاں ڈپٹی کمشنر کی سربراہی میں چلڈرن ہسپتال سے مین روڈ تک آگاہی واک بھی منعقد ہوئی۔
