لاہور: پراونشل ڈیزاسٹر منیجمنٹ اتھارٹی (پی ڈی ایم اے) نے پنجاب کے مختلف اضلاع میں آج رات سے آندھی اور گرج چمک کے ساتھ بارش کی پیش گوئی کی ہے۔
ترجمان پی ڈی ایم اے کے مطابق پنجاب کے بیشتر اضلاع میں آج موسم گرم اور خشک رہے گا۔ تاہم شام اور رات کے اوقات میں بیشتر اضلاع میں آندھی اور گرج چمک کے ساتھ بارش کا امکان ہے۔ ترجمان کے مطابق مری، گلیات، راولپنڈی، اٹک، جہلم، چکوال، بھکر، میانوالی، خوشاب اور نور پور تھل میں آندھی کے ساتھ بارش ہوگی۔
پی ڈی ایم کی جانب سے جاری کی گئی پیش گوئی کے مطابق لاہور، سرگودھا، منڈی بہاؤالدین، گجرات، گوجرانوالہ، سیالکوٹ، نارووال، قصور، اوکاڑہ اور ٹوبہ ٹیک سنگھ میں بھی بارش کا امکان ہے۔ دوسری جانب ملک کے بعض علاقوں میں بارش سے موسم خوشگوار ہوگیا، جب کہ بعض مقامات پر شدید گرمی نے شہریوں کی حالت ابتر کردی۔
نیوز کے مطابق ایک طرف چمن، کوزک ٹاپ، شیلا باغ، ٹوبہ اچکزئی سمیت بلوچستان کے مختلف شہروں میں بارش کا سلسلہ جاری ہے۔ دوسری جانب پیر علی زئی جنگل، قلعہ عبداللہ، پشین میں طوفانی ہواؤں کے باعث کوئٹہ چمن شاہراہ پر ٹریفک کی روانی متاثر ہوئی ہے۔ میرپور، دھیرکوٹ، سماہنی آزاد کشمیر، مانسہرہ میں بھی بارش ہو رہی ہے۔ تاہم سندھ اور پنجاب میں گرمی کی شدت میں اضافہ جاری ہے۔
