ڈپٹی کمشنر عدیل حیدر نے چلڈرن ہسپتال میں پانچ سال تک کے بچوں کو پولیو ویکسین کے قطرے پلا کر چار روزہ انسداد پولیو مہم کا باقاعدہ افتتاح کیا اور مہم کی کامیابی کیلئے دعا بھی کی۔
ڈپٹی کمشنر کا کہنا تھا کہ 02 فروری سے 05 فروری تک جاری رہنے والی چار روزہ انسداد پولیو مہم کے دوران 3 لاکھ 24 ہزار 622 بچوں کو پولیو ویکسین کے قطرے پلائے جائیں گے۔
پولیو مہم کے لئے محکمہ صحت کے 2922 ورکرز پر مشتمل 70 فکسڈ ٹیمیں، 45 ٹرانزٹ پوائنٹس ٹیمیں، گھر گھر جانے والی 1225 ٹیمیں، 70 یوسی ایم اوز جبکہ 242 ایریا انچارجز مقرر کئے گئے ہیں۔
ڈپٹی کمشنر نے ڈی ایچ اوز کو ہدایت کی کہ وہ انسداد پولیو مہم کے دوران ٹیموں کی کارکردگی کی ازخود مانیٹرنگ کریں اور قطرے پلانے والی ٹیموں کی روزانہ کی بنیاد پر سکریننگ کی جائے۔
ڈپٹی کمشنر کا مزید کہنا تھا کہ پولیو کے خاتمے کیلئے ضروری ہے کہ ہم بحیثیت قوم اپنا مثبت کردار ادا کریں، اپنے بچوں کو ہر بار پولیو کے قطرے لازمی پلوائیں تا کہ ہم اپنی آنے والی نسلوں کو اس خطرناک اور موذی مرض سے محفوظ رکھ سکیں۔
ڈپٹی کمشنر کی سربراہی میں چلڈرن ہسپتال سے مین روڈ تک آگاہی واک بھی منعقد ہوئی۔
