پاکستان نے تیل ذخیرہ کرنے کے لیے اقدامات شروع کر دیے ہیں۔ وزیر خزانہ نے تصدیق کی ہے کہ ایران اسرائیل جنگ کے پیش نظر ملک میں پیٹرولیم مصنوعات کی سپلائی اور اسٹاک کا جائزہ لیا جا رہا ہے۔
پیر کو سید نوید قمر کی زیر صدارت قائمہ کمیٹی برائے خزانہ کے اجلاس میں اپوزیشن لیڈر عمر ایوب خان نے کہا کہ ایران اسرائیل جنگ کی وجہ سے تیل کی قیمتیں بڑھ رہی ہیں۔
انہوں نے کہا کہ ایران تیل پیدا کرنے والا دنیا کا چھٹا بڑا ملک ہے۔ دنیا بھر میں آبنائے ہرمز کے ذریعے تیل کی سپلائی متاثر ہو سکتی ہے۔ تیل کی قیمتوں میں اضافے کا اثر اگلے سال کرنٹ اکاؤنٹ خسارے پر پڑ سکتا ہے۔
عمر ایوب نے کہا کہ جنگ کی وجہ سے پاکستان کی تیل کی درآمدات بڑھ سکتی ہیں اور پاکستان کا بجٹ خسارہ بڑھ سکتا ہے۔وزیر خزانہ محمد اورنگزیب نے کمیٹی کو بتایا کہ علاقائی صورتحال کا بغور جائزہ لیا جا رہا ہے۔
وزیراعظم نے ایران اسرائیل جنگ کے باعث تیل کی قیمتوں کا جائزہ لینے کے لیے ایک اعلیٰ سطحی کمیٹی تشکیل دی ہے جس کا پہلا اجلاس ہو چکا ہے اور اب تیل کی سپلائی اور ذخائر کا جائزہ لیا جا رہا ہے۔
واضح رہے کہ ایران اور اسرائیل کے درمیان جنگ کے باعث عالمی منڈی میں تیل کی قیمتوں میں نمایاں اضافہ ہوا ہے۔ ادھر پاکستان میں بھی حکومت نے پٹرول اور ڈیزل کی قیمتوں میں نمایاں اضافہ کر دیا ہے۔ جب کہ یکم جولائی سے حکومت کی جانب سے پیٹرولیم مصنوعات کی قیمتوں میں مزید اضافے کا امکان ہے۔
