سنی علما کونسل پنجاب کے صدر علامہ محمد طاہر اشرف نے بھارتی دھمکیوں کیخلاف پاک فوج کی مکمل حمایت کا اعلان کر دیا ملک کے دفاع کیلئے سنی علما کونسل کے رہنما اور کارکنان اپنی جانوں کا نذرانہ پیش کرنے سے دریغ نہیں کریں گے
سنی علما کونسل پنجاب کے صدر علامہ محمد طاہر اشرف نے ملکوال کے علاقہ بوسال سکھا میں پریس کانفرنس میں صحافیوں سے گفتگو کرتے ہوئے پاکستان کیخلاف بھارتی دھمکیوں کی شدید مذمت کرتے ہوئے کہا کہ پوری قوم بھارتی جارحیت کی صورت میں پاک فوج کے شانہ بشانہ کھڑی ہو گی۔
انہوں نے کہا کہ اگر ملکی دفاع کیلئے ضرورت پڑی تو اپنی جانوں کا نذرانہ پیش کرنے سے بھی دریغ نہیں کریں گے۔ انہوں نے کہا کہ پاکستان کلمہ طیبہ کی بنیاد پر قائم ہوا ہے اس لئے جب تک کلمہ طیبہ موجود ہے پاکستان بھی ان شاءاللہ قائم رہے گا۔
سنی علما کونسل پنجاب کے صدر نے کہا کہ غزہ میں مسلمانوں کے قتل عام پر عالمی طاقتوں اور مسلم حکمرانوں کی خاموشی قابلِ مذمت ہے۔ انہوں نے کہا کہ پاکستان غزہ نہیں ہے بلکہ اس کی ایک مضبوط فوج کے ساتھ کروڑوں عوام بھی جہاد کیلئے تیار ہے۔
انہوں نے کہا کہ پاک فوج بھارت کو سبق سکھانے کیلئے تیار ہے۔ علامہ طاہر اشرف نے کہا کہ ہمارے ملک کی امن خواہش کو ہماری کمزوری نہ سمجھا جائے بلکہ حملہ کی صورت میں بھارت کو منہ توڑ جواب دیا جائے گا۔ اس موقع پر سنی علما کونسل کے ضلعی صدر راؤ اشرف حسینی، رانا واجد اور دیگر رہنما بھی موجود تھے۔
