وزیراعلیٰ بلوچستان سرفراز بگٹی کی جانب سے سانحہ نوشکی بلوچستان میں جاں بحق ہونے والے نوجوانوں کے لواحقین میں 60 لاکھ روپے کے امدادی چیکس تقسیم کر دئیے گئے۔
منڈی بہاوالدین( ایم.بی.ڈین نیوز 23اپریل 2024) تفصیلات کے مطابق ڈپٹی کمشنر منڈی بہاوالدین شاہد عمران مارتھ اور ڈپٹی کمشنر نوشکی، بلوچستان حبیب اللہ موسیٰ خیل نے نوشکی بلوچستان میں دہشت گردی کا نشانہ بننے والے منڈی بہاوالدین کے موضع چک فتح شاہ سے تعلق رکھنے والے 6 شہداء کے لواحقین میں 10 لاکھ روپے فی کس مالی امداد کے چیکس تقسیم کر دئیے۔
بلوچستان: نوشکی میں ایرانی زائرین کی بس پر فائرنگ، 9 افراد شہید
اس موقع پر ڈسٹرکٹ پولیس آفیسر رضا صفدر کاظمی، ایڈیشنل ڈپٹی کمشنر ریونیو ذوالفقار احمد، ضلعی افسران، پولیس اور علاقہ معززین کی بڑی تعداد بھی موجود تھی۔ ڈپٹی کمشنر شاہد عمران مارتھ اور ڈپٹی کمشنر حبیب اللہ موسیٰ خیل نے جاں بحق نوجوانوں کے درجات بلندی کیلئے دعا کی۔ انہوں نے سوگوار خاندانوں سے اظہار تعزیت کرتے ہوئے ورثاء سے گہرے دکھ، رنج و غم اور افسوس کا اظہار کرتے ہوئے انہیں ہر قسم کے تعاون کی یقین دہانی بھی کرائی۔
ان کا کہنا تھا کہ حکومت پنجاب اور بلوچستان متاثرہ خاندانوں کے غم میں برابر کی شریک ہیں۔ یقینا جوان اولاد کا دکھ انتہائی تکلیف دہ ہے، ہماری دعائیں سوگوار خاندانوں کے ساتھ ہیں۔ ان کا کہنا تھا کہ اس واقعہ کے 4 مجرم گرفتار ہو چکے ہیں اور باقی مجرم بھی جلد گرفتار کر کے انہیں سخت سے سخت سزا دلوائی جائے گی۔
