دنیا کے سب سے بڑے ویڈیو اسٹریمنگ پلیٹ فارم یوٹیوب نے اس بات کی تصدیق کی ہے کہ وہ فروری 2023 سے (Shorts) ویڈیوز پر بھی ادائیگی شروع کردے گا۔
یوٹیوب شارٹس فیچر صارفین کو ٹک ٹاک اور اسنیپ چیٹ کی طرح مختصر ویڈیوز بنانے اور شیئر کرنے کی سہولت دیتا ہے اور ایک سال کے دوران اسکی مقبولیت میں نمایاں اضافہ دیکھا گیا ہے۔
یوٹیوب نے اب ان ویڈیوز کے لیے مونیٹائزیشن کے آپشنز متعارف کرادیے ہیں، یوٹیوب کی متعارف کرائی گئی نئی پالیسی کے مطابق اپنی شارٹ ویڈیوز کو مونیٹائز کرنے والے تخلیق کاروں کو ویب سائٹ کے قوانین سے اتفاق کرنا ہوگا۔ 18 سال سے کم عمر content creators کو شرائط کی رضامندی میں اپنے والدین کو بھی شامل کرنا ہوگا۔
یہ بھی پڑھیں: یوٹیوب کے پوڈکاسٹ پروگرام سے آپ بھی پیسہ کما سکتے ہیں
اب یوٹیوب شارٹس پر بھی اشتہارات چلیں گے جس سے حاصل ہونے والی آمدنی کا %45 مواد تخلیق کرنے والوں کو ملے گا، یوٹیوب نے یہ بھی کہا ہے کہ مواد تخلیق کرنے والے اپنی یوٹیوب شارٹس ویڈیوز پر ہر 10 ملین ویوز پر $900 تک کما سکتے ہیں۔
کمپنی نے ان کلپس کو مونیٹائز کرنے کیلئے اپنی پالیسی بھی واضح کی ہے جس کے تحت وہ ویڈیوز جو پہلے ہی دوسرے پلیٹ فارمز پر اپ لوڈ ہو چکی ہوں وہ مونیٹائزیشن کی اہل نہیں ہوں گی، مزید برآں مووی یا گانوں کے کلپس میں ترمیم کرکے بنائی گئی ویڈیوز کو بھی مونیٹائز نہیں کیا جائے گا۔
اپنے چینل کو مونیٹائز کرنے کیلئے تخلیق کاروں کے پاس 365 دنوں کے اندر 4,000 گھنٹے واچ ٹائم ہونا چاہیے یا 90 دنوں کے اندر تمام یوٹیوب شارٹس پر 10 ملین ویوز ہونے چاہئیں۔
اس نئی اپ ڈیٹ کیساتھ یوٹیوب نئے تخلیق کاروں کو انکی محنت اور تخلیقی صلاحیتوں سے فائدہ اٹھانے کا موقع فراہم کر رہا ہے تاہم YouTube تخلیق کاروں کو ادائیگی انکے content کے معیاری ہونے کی بنیاد پر نہیں کرے گا بلکہ ویڈیوز کے وائرل ہونے کو ترجیح دے گا۔
