وزیراعلیٰ پنجاب سردار عثمان بزدار کی ہدایت پر اسسٹنٹ کمشنر پھالیہ ساجد منیر کلیار نے علی الصبح شہر کی سبزی وپھل منڈی جبکہ اسسٹنٹ کمشنر ملکوال عثمان غنی نے تحصیل ہیڈ کوارٹر ہسپتال ملکوال کا اچانک دورہ کیا۔
منڈی بہاﺅالدین( ایم.بی.ڈین نیوز 07 اکتوبر 2021 ) اسسٹنٹ کمشنر ساجد منیر کلیار نے سبزی و پھل منڈی میں دورے کے دوران اشیاء کی بولی کے عمل کا جائز ہ لیا۔ انہوں نے مختلف دکانوں اور گوداموں کے معائنے کے بعد اپنی نگرانی میں پھلوں اور سبزیوں کی نیلامی کا بھی جائزہ بھی لیا۔ ان کے ہمراہ سیکرٹری مارکیٹ اور دیگر افسران بھی موجود تھے۔
اس موقع پر اسسٹنٹ کمشنر ساجد منیر کلیار نے کہاکہ وزیراعظم پاکستان عمران خان اور وزیراعلیٰ پنجاب عثمان بزدار کی ہدایت پر سبزیوں و پھلوں کی قیمتوں کو عوام الناس کو براہ راست ریلیف پہنچانے کیلئے کنٹرول کیا جا رہا ہے اورمنڈی میں نیلامی کے عمل کی مسلسل مانیٹرنگ کی جا رہی ہے یہی وجہ ہے کہ تمام سبزیوں اور پھلوں کی قیمتوں کو حکومت کے مقرر کردہ نرخوں پرعملدرآمد کروایا جا رہا ہے جس کے ثمرات عوام تک پہنچ رہے ہیں۔
انہوں نے آڑھتیوں اور نیلامی کے ممبران سے کہاکہ وہ عوام کی قوت خرید کے مطابق حکومت کے مقرر کردہ ریٹس پر پھل اور سبزیاں فروخت کریں اور صارفین کے حقوق کا خیال رکھیں لہذٰا آڑھتی حضرات حکومت کی جانب سے طے شدہ قیمتیں ہی وصول کریں بصورت دیگر ذخیرہ اندوزوں اور ناجائز منافع خوروں کو قانون شکنی پر سزا بھگتنا پڑے گی۔ اسی طرح اسسٹنٹ کمشنرملکوال نے ٹی ایچ کیو ملکوال کا دورہ کیا ۔ اسسٹنٹ کمشنر نے ہسپتال کے مختلف وارڈز، فارمیسی سمیت صفائی ، ستھرائی اور سکیورٹی کا بھی جائزہ لیا۔
انہوں نے لواحقین سے مریضوں کو فراہم کی جانے والی طبی سہولیات کے بارے میں بھی دریافت کیا۔انہوں نے کہاکہ ہسپتال کے مختلف شعبوں میں ڈاکٹرز اور تکنیکی سٹاف کی کمی کو پورا کرنے کیلئے محکمہ صحت کو سفارشات بھجوا دی گئی ہیں۔ انہوں نے کہا کہ تمام ہسپتالوں بالخصوص سرکاری ہسپتالوں میں مریضوں کو بہترین علاج معالجہ تشخیص کے ساتھ مفت ادویات اور دیگر طبی سہولیات کی فراہمی کو یقینی بنایا جا رہا ہے یہی وجہ ہے سرکاری ہسپتالوں پر عوام کا اعتماد بحال ہوا ہے۔
